У Гомелі адкрыецца першы ў горадзе «Макдональдс»

Штодня рэстарацыя зможа прымаць больш за 5000 чалавек.

Размовам пра «Макдональдс» у Гомелі ўжо нямала гадоў, але дагэтуль канкрэтыкі было мала. Вылучаліся смелыя тэорыі пра тое, дзе ён можа быць пабудаваны і чаму дагэтуль яго няма, - прытым што адна за адной адкрываюцца лакальныя ўстановы з фастфуду. У беларускім прадстаўніцтве кампаніі адзначаюць, што паступалі шматлікія запыты аб планах што да Гомеля. Нарэшце сталі вядомыя прыкладныя дата і месцы, піша «Онлайнер».

Плануецца, што рэстарацыя будзе пабудаваная побач з універмагам «Гомель» у межах вуліцы Хатаевіча і Песіна (цяпер на гэтым месцы бясплатная паркоўка).

Чакаецца, што штодня рэстарацыя зможа прымаць больш за 5000 чалавек, там будзе больш за 100 пасадачных месцаў і лінія «МакДрайв» з магчымасцю абслугоўвання больш за 130 машын у гадзіну. Для сямейнай аўдыторыі традыцыйна прадугледжваецца магчымасць правядзення дзён нараджэння для дзяцей у абсталяваным пакоі для правядзення святаў.

«Чакаецца, што новая рэстарацыя стане ўлюбёным месцам адпачынку і харчавання дзясяткаў тысяч гамельчукоў і гасцей горада і будзе ўключаць ўсе найноўшыя тэхналогіі «Макдональдс» у галіне вытворчасці і хуткага і якаснага сэрвісу, - адзначаюць у кампаніі. - Дзякуючы выкарыстанню і прымяненню ў працы і інтэр'еры апошніх новаўвядзенняў, рэстарацыя стане флагманскай і не будзе адрознівацца ад найбольш сучасных еўрапейскіх рэстарацый кампаніі. Між іншым, інтэр'ер будзе адлюстроўваць найноўшыя дызайнерскія тэндэнцыі (да прыкладу, з'явяцца праекцыйныя інтэрактыўныя сталы), а заказ можна будзе аформіць самастойна з дапамогай кіёскаў самаабслугоўвання, што істотна паскорыць час іх апрацоўкі і збору. У гомельскім «Макдональдсе» таксама будуць увасоблены інавацыі, звязаныя з IT-тэхналогіямі і арганізацыяй сэрвісу. Новая рэстарацыя створыць больш за 100 працоўных месцаў. Адкрыццё рэстарацыі «Макдональдс» у Гомелі стане новым крокам кампаніі ў рамках яе экспансіі ў рэгіёны».

У 2014-м першая ў Беларусі рэгіянальная рэстарацыя «Макдональдс» была адкрытая ў Віцебску.