Хто і колькі ў Беларусі зарабляе на дарах лесу

Грыбнікі за месяц могуць выручыць ад продажу грыбоў ад 300 да 500 рублёў.

За 40 хвілін дасведчаны грыбнік збірае вядро грыбоў. Случчакі распавялі kurjer.info, наколькі можна павялічыць даход на «ціхім паляванні».

У сярэдзіне дня прадаўцоў грыбоў на рынку няшмат: чалавек восем-дзевяць рознага ўзросту - ад 15 да 70 гадоў.

У будні дзень і пакупнікоў мала. Для сушкі, замарозкі, смажання, марынавання яны купляюць у грыбнікоў баравікі, падбярозавікі, чырвонагаловікі, лісічкі. Для засолкі і салянкі - апенькі, рыжыкі, масляты, радоўкі.

Кошты ўсе прадаўцы трымаюць аднолькавыя:

Трохлітровае вядзерца:

- падбярозавікі і чырвонагаловікі - ад 10 рублёў,

- баравікі - 12 рублёў,

- лісічкі, радоўкі - 5-6 рублёў;

- пяцілітровае вядзерца:

- падбярозавікі і чырвонагаловікі - 15 рублёў

- баравікі -20 рублёў,

- лісічкі, радоўкі - 10-12 рублёў.

Уладзімір, жыхар адной з вёсак Слуцкага раёна, грыбнік-аматар са стажам, на выгляд гадоў 40. Ён добра разбіраецца ў грыбах, і прагулка па лесе для яго не толькі заробак, але і задавальненне. У грыбны сезон ходзіць у лес праз дзень-два. Звычайна «палюе» не далей чым за паўтары кіламетры вакол вёскі. Збірае не ўсё запар, а выбарачна: апенькі, баравікі, чырвонагаловікі, лісічкі.

«Для мяне збор грыбоў - нядрэнная дапамога, каб купіць дзецям неабходныя рэчы. Заробак невысокі, сабраць дзетак у школу накладна. У добры сезон можна набраць вядро грыбоў за 40 хвілін. У будні дзень прадаю вядры тры. Калі пакупнікоў больш - чатыры, у выхадныя – больш за пяць. Арыентуюся на попыт».

Галіна Іванаўна, пенсіянерка, жыве ў Слуцку. На яе прылаўку баравікі, падбярозавікі, чырвонагаловікі. Грыбнік - яе муж Пятро Паўлавіч.

«Я з ім езджу ў лес за кампанію, - кажа Галіна Іванаўна. - Асноўная доля сабраных грыбоў - яго заслуга, я больш гуляю, чым збіраю. А вось прадаваць - мой клопат.

Ездзім у грыбы не часта, калі дазваляе здароўе. Бяром 2-3 вядры: штосьці для сябе, нешта прадаць. Гэтай восенню грыбоў вельмі шмат - за хвілін пяцьдзесят можна сабраць вядзерца. Пенсія невялікая, лішняя капейка ў гаспадарцы не перашкодзіць. Сёння грыбы з Паўлоўкі (вёска ў Менскім напрамку)».

Любоў Яцкевіч, пенсіянерка, жыве ў Слуцку. Ездзіць у грыбы і ягады разам з сынам. Сёння на яе прылаўку адны радоўкі - восеньскія грыбы, другая назва - сярушкі.

«Люблю збіраць ягады і грыбы - адпачынак з карысцю. Раз ці два на тыдзень выязджаем у лес, часцей за ўсё ў раён Асіповічаў. Бяром чырвонагаловікі, баравічкі, рыжыкі, масляты. У Слуцкім раёне шмат радовак, яны карыстаюцца попытам для засолкі і салянак. У будні дзень прадаю прыкладна тры вядры. У выхадныя - больш. Прыбытак ад продажу грыбоў невялікі, але ўсё ж прыбаўка да пенсіі».

Грыбнікі за месяц могуць выручыць ад продажу грыбоў ад 300 да 500 рублёў, калі гандлююць праз дзень і ім атрымліваецца прадаць тры вядры на дзень.