Нямецкія палітыкі зарабляюць менш за лекараў, адвакатаў або мэнэджараў

Стала вядома, колькі зарабляе канцлерка Нямеччыны Ангела Меркель.

Сістэму, паводле якой разлічваецца памер аплаты працы нямецкіх палітыкаў, пры ўсім жаданні нельга назваць простай і зразумелай. Афіцыйна дэпутаты атрымліваюць за сваю працу не заробак, а грошы на прадстаўнічыя выдаткі, якія таксама называюць "дыетай". Пры гэтым галадаць парламентарыям не даводзіцца: да прыкладу, дэпутат бундэстага зарабляе 9542 еўры за месяц, паведамляе «Нямецкая хваля».

Дэпутаты мясцовага ўзроўню зарабляюць менш

Дадаткова да асноўнага заробку парламентарый штомесяц атрымлівае 4318 еўраў у якасці кампенсацыі на пакрыццё службовых выдаткаў – да прыкладу, на арэнду жылля непадалёк ад бундэстага, харчаванне і транспартныя выдаткі. Гэтая сума не абкладаецца падаткам. Але гэта яшчэ не ўсё: у дэпутата ёсць магчымасць абнавіць абсталяванне свайго офіса на суму да 12 000 еўраў за год, у тым ліку, да прыкладу, абзавесціся новым смартфонам ці кава-машынай. Выплаты ажыццяўляюцца толькі пры ўмове падачы чэкаў на набыткі. Акрамя таго, "дыеты" дэпутатаў бундэстага штогод індэксуюцца ў адпаведнасці з паказнікамі росту сярэдняга заробку ў краіне.

А як ідзе справа на ўзроўні федэральных земляў? Дэпутаты ландтага таксама атрымліваюць "дыеты" і фіксаваную суму на пакрыццё службовых выдаткаў, аднак іх памер у розных рэгіёнах значна адрозніваецца. Да прыкладу, у Гамбургу "дыета" дэпутата складае толькі 2641 еўра без уліку кампенсацыйнай сумы 350 еўраў. У сваю чаргу чальцы ландтага федэральнай зямлі Паўночны Рэйн-Вестфалія зарабляюць 9500 еўраў за месяц, але кампенсацыя службовых выдаткаў тут не прадугледжаная.

Аднак пяройдзем да ключавых постацяў нямецкай палітыкі: колькі ж зарабляюць канцлерка ФРГ Ангела Меркель (Angela Merkel), міністр замежных справаў Зігмар Габрыэль (Sigmar Gabriel), прэзідэнт Франк-Вальтэр Штайнмаер (Frank-Walter Steinmeier) і іншыя палітычныя цяжкавагавікі? На прыведзеным ніжэй інфаграфіку для параўнання пададзены заробак палітычных лідараў і аклады дэпутатаў федэральнага і зямельнага ўзроўню.

Нягледзячы на тое, што прэзідэнт Нямеччыны выконвае толькі прадстаўнічыя функцыі, больш за ўсіх зарабляе менавіта Франк-Вальтэр Штайнмаер. Паводле інфармацыі, размешчанай на інтэрнэт-сайце прэзідэнта ФРГ, памер ягонага ўзнагароджання складае дзесяць дзявятых ад заробку канцлеркі. З прычыны таго, што заробак Меркель на гэты момант складае 18 820 еўраў, Штайнмаер атрымлівае 20 911 еўраў за месяц.

Заробак Меркель ніжэйшы, чым у Трампа

Міністры федэральнага ўрада таксама зарабляюць вельмі нядрэнна: іх штомесячны аклад складае блізу 15 000 еўраў. У палітычных лідараў ён фармуецца за кошт асноўнага заробку і разнастайных даплатаў. Хоць заробак канцлеркі меншы, чым у прэзідэнта ФРГ, фактычна Ангела Меркель займае самы значны палітычны пост у краіне. У сувязі з гэтым цікава параўнаць яе прыбыткі з прыбыткамі кіраўнікоў урадаў іншых краінаў.

Калі зірнуць на рэйтынг, складзены гамбургскім інстытутам Statista, то Меркель са сваім заробкам знаходзіцца ў верхняй частцы спісу. Значна больш за канцлерку ФРГ зарабляюць толькі нешматлікія сусветныя лідары: у іх ліку прэзідэнт ЗША з гадавым акладам 333 000 еўраў за год, а таксама абсалютны лідар рэйтынгу прэм'ер-міністр Сінгапура Лі Сяньлун, гадавы заробак якога складае ні многа ні мала 1,5 млн еўраў.

Нямецкія лекары і адвакаты – багацейшыя за палітыкаў

Зрэшты, немцы звычайна параўноўваюць прыбыткі сваіх палітыкаў не з заробкам іхніх замежных калегаў, а, у першую чаргу, з заробках звычайных грамадзянаў Нямеччыны. Памер прыбыткаў як чальцоў урада, так і шараговых дэпутатаў у любым выпадку значна перавышае сярэдні ўзровень заробкаў у краіне. За гэта слугі народа рэгулярна крытыкуюцца з боку грамадскасці.

Пры гэтым варта адзначыць, што заробкі большасці палітыкаў ужо даўно не могуць параўнацца з заробкамі лекараў, адвакатаў або мэнэджараў. Да прыкладу, паводле звестак рэсурсу correctiv.org, гадавы прыбытак чальца кіравання рэгіянальнага ашчаднага банка можа перавысіць 850 000 еўраў. Гэта больш чым у тры разы перавышае аклад канцлеркі Меркель, праца якой у інтэнсіўнасці наўрад ці можа параўнацца з якой-небудзь іншай прафесіяй.