У Мінпрацы і падатковай распавялі, як зменіцца дэкрэт аб «дармаедах»

Відавочна, што выплаты падаткаў чакаюць ад абсалютна ўсіх грамадзян Беларусі.

Дэкрэт № 3 перажывае карэнную рэканструкцыю, цяпер ён рыхтуецца ў абсалютна новай рэдакцыі, змяняецца не толькі сэнс дэкрэта, але нават яго назва, распавёў намеснік міністра працы і сацыяльнай абароны Валерый Кавалькоў падчас онлайн-канферэнцыі на сайце Белтэлерадыёкампаніі.

- Плануецца, што дэкрэт будзе называцца «Для спрыяння занятасці», - паведаміў Валерый Кавалькоў.

Прадстаўнік Мінпрацы таксама распавёў, як будуць стыкавацца абноўлены дэкрэт №3 і ўказ Лукашэнкі №337 «Аб рэгуляванні дзейнасці фізічных асоб», якім пашырылі спіс тыпаў дзейнасці, для заняткаў якімі фізічным асобам не трэба рэгістравацца ў якасці індывідуальных прадпрымальнікаў.

- Калі казаць пра тое, каго мы будзем адносіць да занятых у эканоміцы і незанятых у эканоміцы (ужо такія паняцці ў новым дэкрэце выкарыстоўваюцца) зноў жа будзе залежаць ад таго, ці з'яўляецца ён рамеснікам ці не. Калі чалавек зарэгістраваны ў падатковай, заплаціў збор, то ён з'яўляецца занятым у эканоміцы, ніхто кантраляваць не будзе фактычна заняты ён у гэтай дзейнасці ці не. І рэгістрацыя ў ФСАН ужо не абавязковая. Ён надумаў займацца нейкім тыпам дзейнасці, быць самазанятым, ён выплачвае стаўку адзінага падатку, значыць, ён заняты ў эканоміцы, - распавёў Валерый Кавалькоў.

Гэтае пытанне таксама пракаментавала намесніца міністра падаткаў і збораў Святлана Шаўчэнка.

- Давайце растлумачу дзейны дэкрэт №3. У ім гаворыцца, што тыя асобы, якія самазанятыя дзейнасцю, займаюцца дзейнасцю, якая не патрабуе рэгістрацыі ў якасці ІП, пры ўмове выплаты адзінага падатку (а мы з вамі гаварылі, што ў падатковым кодэксе цяпер пазначаныя 18 тыпаў дзейнасці), не прызнаюцца плацельшчыкамі збору на фінансаванне дзяржаўных выдаткаў.

Гэта прапісана ў дэкрэце №3. Указ №337 пашырае тыпы дзейнасці, ён не ўстанаўлівае новапарадак, ён пашырае тыпы дзейнасці, адпаведна, на тых асоб, якія будуць займацца тынкавальнымі, малярнымі працамі, шыццём адзення, на іх дакладна такія ж умовы будуць распаўсюджвацца. Заплаціў падатак, заявіў, што ты займаешся дзейнасцю, адпаведна ні пра якую выплату збору ўжо гаворкі быць не можа.