МАК абвінавачваюць у «закулісных угодах» з Расеяй праз допінгавы скандал

На Алімпійскі камітэт абрынуўся шквал крытыкі.

Стваральнікі дакументальнага фільма, які выкрывае расейскую праспансаваную дзяржавай допінгавую праграму, абвінавацілі Міжнародны алімпійскі камітэт (МАК) у «закулісных угодах» з Масквой напярэдадні зімовай Алімпіяды ў Паўднёвай Карэі ў лютым», - піша карэспандэнт Люк Гардзінг The Guardian, (пераклад - inopressa.ru).

«Выкрывальнік, які праліў святло на гэтую праграму, доктар Рыгор Родчанкаў цяпер стаіўся дзесьці ў ЗША. Родчанкаў - былы дырэктар маскоўскага антыдопінгавага цэнтра - галоўны герой дакументальнага фільма «Ікар», які выйшаў на Netflix і ў аўторак быў намінаваны на прэмію Bafta», - гаворыцца ў артыкуле.

«Рэжысёр фільма Браян Фогель і прадусар Дэн Коган сцвярджаюць, што МАК адступіўся ад свайго абавязацельства не дапусціць расейскіх спартоўцаў да спаборніцтваў», - паведамляе журналіст. «Чым больш пільна вывучаеш дэталі адхілення [расейскіх спартоўцаў], тым выразней бачыш сведчанні закулісных пагадненняў з Масквой», - сказаў Коган The Guardian.

«Цяпер 42 расейцы дамагаюцца апеляцыі на адхіленне ад Алімпіяды. Справы гэтых спартоўцаў павінны быць заслуханыя ў Спартовым арбітражным судзе (CAS) 22 студзеня, і, чакаецца, што пастановы аб іх будуць прынятыя да 31 студзеня, за дзевяць дзён да адкрыцця Гульняў», - гаворыцца ў артыкуле.

«Аднак Коган сказаў, што МАК намагае на асабістай прысутнасці Родчанкава на слуханнях. Калі ён не з'явіцца, CAS можа дазволіць згаданым спартоўцам удзельнічаць у Алімпіядзе пад нейтральным сцягам», - паведамляе Гардзінг.

«На іх будзе адзенне з надпісамі «Алімпійскі спартовец з Расеі», ім дазволяць удзельнічаць у парадзе на цырымоніі закрыцця, - указаў Коган. - Гэта падарунак Пуціну, які зможа паказаць відэазапіс з трыумфальнымі расейскімі спартоўцамі на тэлевізіі, каб стварыць уражанне, што нічога не здарылася».

«МАК аддае перавагу абараняць Расею, а не цэласнасць алімпійскіх ідэалаў, якія ён павінен падтрымліваць», - крытыкуе прадусар.