У Беларусі адрэгулююць кошты цукру
52- 12.01.2018, 15:23
- 39,058
У першую чаргу - на «танны» расейскі.
У Беларусі плануюць заняцца рэгуляваннем коштаў цукру. Прычына - з'яўленне ў гандлі расейскага цукру, прыкметна таннейшага за беларускі, адзначаюць удзельнікі рынка. У снежні мінулага года белы крышталічны цукар уключылі ў спіс сацыяльна значных тавараў, кошты якога рэгулююцца МАРГ да 90 дзён цягам аднаго года.
У распараджэнні рэдакцыі tut.by апынулася копія разасланай рытэйлерам пастановы МАРГ. Дакумент ужо зарэгістраваны на нацыянальным прававым інтэрнэт-партале, аднак пакуль не апублікаваны.
У разасланым рытэйлерам дакуменце гаворыцца, што гранічныя мінімальныя кошты вырабленага (ці ўвезенага) цукру белага крышталічнага, які рэалізуецца на тэрыторыі Беларусі, устанаўліваюцца наступным чынам:
Адпускны кошт франка-адпраўлення (без ПДВ) - 1,19 рубля, адпускны кошт франка-прызначэння (без ПДВ) - 1,22 рубля, а раздробны кошт цукру белага крышталічнага (з ПДВ) - 1,5 рубля.
Гэта значыць, з уступленнем пастановы МАРГ у дзеянне мінімальны кошт расейскага цукру не павінен быць ніжэйшым за 1,5 рубля. Вырастуць і закупачныя аптовыя кошты.
Адзначым, што цяпер краснадарскія вытворцы прапануюць аптовую закупку нерасфасаванага цукру па 0,89 беларускага рубля, а бранскія - па 0,9 рубля. Фасаваны па аднаму кілаграму цукар у Бранску прапануюць оптам па 0,97 рубля, распавядае прадстаўнік аднаго з рытэйлераў.
Як тлумачыць прадстаўнік аднаго з рытэйлераў, цяпер склалася такая сітуацыя, што расейскі цукар у нашай краіне прадаецца танней, чым айчынны. Да прыкладу, у адной з гандлёвых сетак цяпер расейскі крышталічны бураковы цукар каштуе 1,39 рубля за кілаграм, а слуцкі і гарадзейскі - 1,59 рубля за кілаграм.
- Пакупнікі глядзяць на кошт, а не на вытворцу, таму больш ахвотна бяруць больш танны расейскі цукар, а не беларускі, на які вышэйшыя кошты, - распавядае прадстаўнік аднаго з рытэйлераў.
Пры гэтым шматлікія дзяржустановы, у тым ліку дзіцячыя садкі і школы, праз тэндэр закупляюць менавіта расейскі цукар. Прычына ўсё тая ж - ніжэйшы кошт у параўнанні з беларускім.
Пастанова рэгулюе і максімальныя кошты цукру.
«Гранічныя максімальныя гандлёвыя надбаўкі (з улікам аптовай надбаўкі) да адпускнога кошту вытворцы (імпарцёра) на цукар белы крышталічны, які рэалізуецца на тэрыторыі Беларусі, у суме 15%, - гаворыцца ў дакуменце. - Вызначыць, што фармаванне коштаў цукру белага крышталічнага адбываецца з улікам кан'юнктуры рынку, але не ніжэй за гранічныя мінімальныя кошты, з пералікам коштаў прапарцыйна колькасці, расфасаванай у пакаванне».
Пастанова павінна ўвайсці ў дзеянне пасля яе афіцыйнага апублікавання і будзе дзейнічаць цягам 90 дзён.