Саудаўскія жанчыны ўпершыню змаглі прыйсці на футбол без мужчын

Жанчынам у Саудаўскай Арабіі дазволілі паглядзець тры матчы ў спецыяльна адведзеных сектарах стадыёнаў.

Жанчыны ў Саудаўскай Арабіі ўпершыню змаглі самастойна наведаць футбольны матч. Як паведаміла агенцтва AFP у пятніцу, 12 студзеня заўзятаркі былі дапушчаныя на матч з удзелам прафесійных каманд «Аль-Ахлі» і «Аль-Батен» у Джыдзе.

На мінулым тыдні ўрад каралеўства абвясціў, што жанчыны змогуць паглядзець тры футбольныя матчы ў спецыяльна адведзеных сектарах стадыёнаў. Прычым ім дазваляецца прыйсці на футбольную арэну як у суправаджэнні сям'і, так і ў адзіночку. Футбольныя каманды ўжо прапаноўваюць заўзятаркам набываць галаўныя хусткі ў клубнай расфарбоўцы, піша Нямецкая хваля.

У ультракансерватыўным каралеўстве, зборная якога пятым разам у сваёй гісторыі кваліфікавалася для ўдзелу ў чэмпіянаце свету ў футболе 2018 года, дзе яна згуляе ў матчы адкрыцця супраць Расеі, жанчынам было вельмі строга забаронена наведваць стадыёны. Першае выключэнне было зроблена ў верасні 2017 года, калі ў дзень нацыянальнага свята жанчынам дазволілі прыйсці на стадыён у суправаджэнні іх семейнікаў. Дазвол на наведванне спартыўных аб'ектаў стала яшчэ адным крокам у праграме мадэрнізацыі грамадства, якую праводзіць наследны прынц Мухамед бен Сальман Аль Сауд. У рамках гэтай жа праграмы, пачынаючы з сакавіка, жанчыны змогуць таксама наведваць кінатэатры.

Першы аўтасалон для жанчын

У той жа дзень у Джыдзе адкрыў свае дзверы першы аўтасалон для жанчын. За пяць месяцаў да ўваходжанне ў дзеянне афіцыйнага дазволу жанчынам самастойна кіраваць аўтамабілем, матацыклам і нават грузавіком яны самі могуць выбраць сабе падыходную машыну для гэтага гістарычнага моманту. Складзеная цалкам з жанчын каманда мэнэджараў салона дапаможа пакупніцы не толькі ў тэхнічных пытаннях, але і дасць парады ў крэдытаванні пакупкі.