«ЖКГ не датычыцца»: Рамонт пад'ездаў - клопат жыхароў

Ад жыхароў дома ў Гомелі патрабуюць зафарбаваць надпісы ў пад'ездзе або давядзецца плаціць.

Зафарбаваць непрыстойныя надпісы - ці давядзецца плаціць. Такі ультыматум з'явіўся на дзвярах аднаго з дамоў на вуліцы Барыкіна ў Гомелі.

Аб'яву размясціла Рамонтна-эксплуатацыйная ўправа. У жыхароў дома час да 24-га студзеня. У адваротным выпадку камунальнікі пафарбуюць сцены самі, а суму расходаў унясуць у камунальныя аплаты.

Па тлумачэнні «Белсат» звярнуўся да аўтараў аб'явы

Са слоў кіраўніка РЭУ-15, патрабаванне мае законныя падставы.

«Вы плаціце за капітальны рамонт, вы плаціце за тэхабслугоўванне, плаціце за прыборку, але за рамонт пад'езда вы не плаціце. Рамонт пад'езда цяпер робіцца за кошт жыхароў. Гэта пастанова, закон Беларусь 2014 года», - распавяла Ірына Дашкевіч.

Пастанова №12 Міністэрства жыллёва-камунальнай гаспадаркі сапраўды размежавала пералік работ, якія выконваюцца за кошт уласнікаў і за кошт ЖЭС. Згодна з дакументам, за стан пад'ездаў - у тым ліку за выгляд сцен - адказваюць жыхары.

Што рабіць у такіх выпадках?

Звярнуцца ў міліцыю раіць старшыня таварыства ўласнікаў Эдуард Латушка. Бо надпісы - гэта вандалізм, а такімі справамі займаюцца праваахоўнікі.

«У мяне раз цэлы пад'езд дзеці размалявалі. І міліцыя вельмі хутка выявіла гэта ўсё. І тады бацькі гэтых дзяцей - яны былі з іншых дамоў - прыйшлі і вельмі хутка зрабілі касметычны рамонт усяго пад'езда», - успамінае Эдуард Латушка з аб'яднання «Супольнае домаўладанне».

Жыхарам дома патрэбны не касметычны, а капітальны рамонт

А за гэта ўжо адказваюць не ўласнікі, а камунальнікі.

«Напраўду хацелася б, каб дом прывялі ў парадак нарэшце, так балюча глядзець. Я тут нарадзіўся, вырас і ў прынцыпе ўсё жыццё тут было нешта незразумелае. Бязладдзе адным словам», - падсумаваў сітуацыю малады хлопец з дома.