Чаму дачыненні ЗША і РФ за Трампам будуць пагаршацца

На карысць гэтага сведчаць некаторыя вельмі выразныя прыкметы.

Ульрых Кюн (Ulrich Kühn) - аналітык венскага Цэнтра раззбраення і нераспаўсюджання ядзернай зброі, які займаецца пытаннямі замежнай палітыкі і палітыкі ў сферы бяспекі ЗША, Расеі і Нямеччыны. У інтэрв'ю DW Кюн даў ацэнку курсу ў дачыненні да РФ Дональда Трампа, які адзначае год знаходжання ў Белым доме, а таксама патлумачыў, чаго варта чакаць у будучыні ад расейска-амерыканскіх стасункаў.

- Ці ёсць у Трамп нейкая стратэгія ў дачыненні да Расеі? Або ўзмацненне жорсткасці ягонага курсу ў дачыненні да Масквы - гэта рэакцыя на ціск з боку Кангрэса?

- Найперш, я мяркую, што ў Дональда Трампа наогул няма ніякай стратэгіі ў дачыненні да Расеі. У чым я яму веру, дык гэта ў тым, што ён пільнуецца думкі, што для ЗША мела б сэнс неяк дамовіцца з Расеяй і не мець з ёй відавочных праблем. Думаю, у гэтым ён арыентуецца на амерыканскіх кансерватараў, на Рональда Рэйгана і ягоную палітыку разрадкі канца 80-х гадоў.

Адначасова з гэтым ён зусім не ведае, як паводзіць сябе з Расеяй, бо не цікавіцца сапраўднай палітыкай. Гэта складанае пытанне, расейска-амерыканскія стасункі ўжо доўгі час абцяжараныя праблемамі - гэта і пашырэнне NАТО на Усход, і дамовы аб кантролі над узбраеннямі, напрыклад дамова РСМД, які, як кажуць у Вашынгтоне, Масква парушае.

Гэта ўсё тыя тэмы, у якіх Трамп не арыентуецца, бо зусім не цікавіцца імі. Пакуль не абмяркоўваюцца гэтыя пытанні, няма ніякага шанцу на з'яўленне стратэгіі Трампа ў дачыненні да Расеі.

- Як будуць развівацца ў найбліжэйшай будучыні расейска-амерыканскія стасункі?

- Я думаю, што яны ў наступныя тры гады прэзідэнцтва Трампа будуць і далей пагаршацца. На карысць гэтага сведчаць некаторыя вельмі выразныя прыкметы. Перш за ўсё, трэба сказаць, што ў Вашынгтоне пануе кансэнсус да таго, што Расея ўмяшалася ў прэзідэнцкія выбары ў ЗША ў 2016 годзе. І такім чынам быў парушаны суверэнітэт самай моцнай дзяржавы ў свеце. Кансэнсус у гэтым пытанні такі, што дэмакраты і рэспубліканцы ў Кангрэсе не могуць прыйсці да адзінага меркавання ані ў воднай тэме, акрамя адзінай: Расея - галоўны вораг ЗША.

І тут Дональд Трамп з яго стаўленнем да Уладзіміра Пуціна нічога не можа і не зможа змяніць. Таму што Трамп - вельмі слабы прэзідэнт. Ён не мае ніякай парадку дня і ніякай цікавасці да палітычных працэсаў. А за яго спінай у ЗША між тым праводзіцца абсалютна канкрэтная жорсткая рэальная палітыка.

Напрыклад, пастаўкі зброі Украіне, што яшчэ за Абамам было немагчыма, а цяпер гэта робіцца. Расея таксама адкрыта крытыкуецца ім за парушэнні санкцый у дачыненні да Паўночнай Карэі. І таму я хацеў бы загадзя сказаць, што цягам наступных трох гадоў стасункі Масквы і Вашынгтона будуць і далей істотна пагаршацца.