Новую порцыю дзяржпадтрымкі прамысловым гігантам пастанавілі засакрэціць

Чарговыя захады дзяржпадтрымкі буйным прадпрыемствам лёгкай і цяжкай прамысловасці не сталі здабыткам для шырокай публікі.

Як атрымалася высветліць tut.by, адпаведныя дакументы маюць грыф «для службовага карыстання».

5 студзеня 2017 года прэс-служба Лукашэнкі паведаміла, што правадыр прыняў пастанову аб падтрымцы асобных прадпрыемстваў сістэмы Мінпрама і «Беллегпрама» і падпісаў адпаведныя прававыя акты.

Прадпрыемствам дадзеная адтэрміноўка для вяртання пазыковых сродкаў, а таксама растэрміноўка ў выплаце адсоткаў за выдадзеныя банкаўскія крэдытныя рэсурсы, гаварылася ў паведамленні. Пры гэтым з улікам патрабаванняў Лукашэнкі «прапанаваныя тэрміны вяртання выдзеленых сродкаў былі скарочаныя, а таксама сталі больш жорсткімі ўмовы выдачы дзяржавай падтрымкі». Назвы прадпрыемстваў і падрабязныя захады не падаваліся.

Пасля двух тыдняў рэлевантныя дакументы так і не з'явіліся на Нацыянальным прававым партале. Атрымаць каментар у прэс-службе Лукашэнкі не атрымалася.

«Дакумент ДСП», — сказалі ў Мінпраме, ад іншых каментароў адмовіліся.

Суразмоўца на адным з прамысловых прадпрыемстваў растлумачыў, што «захады дзяржпадтрымкі няправільна тлумачацца [канкурэнтамі, банкамі і рэгулятарамі іншых краін] і прычыняюць нам пэўныя праблемы на замежных рынках».

У прэс-службе «Беллегпрама» запэўніваюць, што гаворка ідзе аб падтрымцы «Блакіта», але ўказ наконт яго быў падпісаны 28 снежня і тычыўся рэструктурызацыі запазычанасці за крэдыты да 2029 года. Раней Лукашэнка абяцаў паспрыяць «Камволю». 17 студзеня ўрад пагадзіўся ў 2018 годзе кампенсаваць з бюджэту прадпрыемству 100% стаўкі за крэдыт Беларусбанка.

У снежні віцэ-прэм'ер Уладзімір Сямашка анансаваў захады дзяржпадтрымкі некалькіх прамысловых флагманаў, у тым ліку БМЗ і МАЗа. «Гаворка ідзе пераважна пра рэструктурызацыю пазык. Я казаў пра тое, як прамысловасць страціла абарачэнне (за другую палову 2014 года, калі штучна трымалі курс беларускага рубля). Ёсць тры сістэмныя праблемы. Першая — страчанае абарачэнне прамысловасці. Гэта значыць, сёння сітуацыя спрыяльная, але абаротныя сродкі трэба папаўняць. Другая — бралі крэдыты па 50-60% і закрэдытаваліся, сёння гэта вялікі цяжар для прадпрыемстваў. Трэцяе, калі ўзяць БМЗ, — сусветныя кошты іх прадукцыі за тры гады ўпалі прыкладна ўдвая, а ў бізнэс-планах, якія рабіліся раней, плыні разлічваліся зыходзячы з ранейшых коштаў і ставак за крэдыты», — распавядаў віцэ-прэм'ер.

Сямашка падкрэсліў, што, нягледзячы на рэструктурызацыю пазык, усе крэдыты будуць выплачвацца і абслугоўвацца. Усе паказчыкі дзейнасці прадпрыемства, завінавачанасці, якія плануецца рэструктураваць, выконваюцца, запэўніў ён. Наконт БМЗ, удакладніў віцэ-прэм'ер, гаворка ідзе аб рэструктурызацыі крэдыту на 70 млн. даляраў, «Івацэвічыдрэў» — блізу 35 млн, якія меркавалася пралангаваць на 4 гады.