Менскае «Дынама» перамагло рыжскіх аднаклубнікаў у матчы на адкрытым паветры
- 20.01.2018, 17:01
- 9,640
«Зубры» захавалі шанцы на выхад у плэй-оф.
Менскае «Дынама» перамагло ў сталіцы Латвіі рыжскіх аднаклубнікаў з лікам 3:2 (0:1, 2:1, 1:0). Матч другі раз у гісторыі Кантынентальнай хакейнай лігі праходзіў на адкрытым паветры, піша tut.by.
На тэрыторыі стадыёна сярэдняй школы былі размешчаныя трыбуны, разам больш за 8000 чалавек. Гульня праходзіла пры камфортнай для гульцоў тэмпературы - мінус 2 градусы. Зрэшты, хакеісты ўсё адно выкарыстоўвалі сродкі абароны: маскі і мазі для абароны вачэй. А галкіпер менчукоў Юнас Энрот выйшаў на лёд у шапцы над шаломам.
Матч больш упэўнена пачалі матываваныя перамагчы дома жыхары Рыгі. Яны дамінавалі ў першым перыядзе, што прывяло да голу Брэндана Макмілана на 13-й хвіліне.
А ў сярэдзіне другога перыяду Рыхардс Букартс павялічыў перавагу гаспадароў, даслаўшы шайбу у блізкі кут брамы Юнаса Энрота.
Зрэшты, «зубры» не здаліся і змаглі выратаваць матч. Цягам хвіліны спачатку Джасцін Фантэйн закінуў у большасці, а потым Дзяніс Осіпаў закінуў першую шайбу ў складзе «Дынама».
Трэці перыяд праходзіў у роўнай барацьбе, здавалася, лёс гульні будзе вызначацца ў овертайме ці па булітах, але за чатыры хвіліны да сірэны Джэк Скіле падкарэктаваў шайбу пасля далёкага кідка Уладзіміра Дзянісава - 2:3.
На апошняй хвіліне трэнерскі штаб гаспадароў змяніў брамніка на шостага палявога гульца, але «зубры» не далі спаборніку шанцаў зраўняць лік.
«Дынама-Мінск»: Энрот (Карнавухаў); Граньяні - Дзянісаў (К), Скіле - Хаўдэн - Фантэйн; Корабаў (А) - Восіпаў, Паўловіч (А) - Кавыршын - Сцяпанаў; Хенкель - Лісавец, Кітараў - Волкаў - Дрозд; Буйніцкі - Шаранговіч - Лінгле; Знахарэнка, Карабань.
Гэтая перамога дазволіла «Дынама» застацца ў барацьбе за плэй-оф. Адставанне ад першай васьмёркі за чатыры туры да канца рэгулярнага сезону складае 10 балаў.