Працадаўцы забываюць аб падвышэнні пенсійнага ўзросту

Беларус у 50 гадоў для многіх ужо практычна пенсіянер.

Дырэктар агенцтва для падбору персаналу «Кадры» Віктар Зяленін распавёў «Вечернему Бобруйску», што цяпер характэрна для бабруйскага рынку працы і якія тэндэнцыі, магчыма, чакаюць яго ў будучыні.

У першую чаргу экспэрт адзначае запатрабаванасць у горадзе тэхнічных спецыяльнасцяў на ўсіх узроўнях – патрэбныя і станочнікі, спецыялісты па эксплуатацыі, апрацоўцы металу з сярэдне-спецыяльнай адукацыяй, і людзі, якія маюць вышэйшую тэхнічную адукацыю.

Гэтым спецыялістам знайсці працу прасцей, мяркуе Зяленін. Складаней цяпер знайсці работу эканамістам, мэнэджарам - са слоў заснавальніка «Кадраў», спецыялісты, якія скончылі мясцовы БДЭУ, засталіся ў Бабруйску і проста насыцілі рынак. Ды і сярод наймальнікаў дыплом Бабруйскага філіяла цэніцца менш, калі параўноўваць з галоўнай ВНУ.

Спецыяліст мяркуе, што наяўнасць вышэйшай адукацыі ў прынцыпе не гарантуе працаўладкаванне, у большай ступені ў пошуку работнікаў да іх звяртаюцца заводы і ЖКГ. Нейкіх асаблівых патрабаванняў у прадпрыемстваў няма. Усе чакаюць ад патэнцыйных супрацоўнікаў прыстойнасці, працаздольнасці, дысцыпліны і гатоўнасці працаваць паводле здзельнай сістэмы аплаты. Пераход на такі тып разліку - яшчэ адна навіна, з якой цяпер усё часцей сустракаюцца работнікі.

На высокі заробак, са слоў Зяленіна, у Бабруйску складана разлічваць. Рэдка прапануюць больш за 300-400 рублёў.

Яшчэ адна праблема для суіскальнікаў, якую пазначыў экспэрт, - працадаўцы забываюць, а можа быць, яшчэ не прывыклі да павышэння пенсійнага ўзросту. Мужчына ў 50 гадоў для многіх ужо практычна пенсіянер, а яму яшчэ 13 гадоў працаваць.

Віктар Зяленін прызнае, што цяпер на адну вакансію будзе конкурс у некалькі чалавек, ад профілю і заробку залежыць, колькі менавіта.

Некалькі парад для тых, хто шукае працу

Можна паспрабаваць атрымаць максімум інфармацыі праз тэлефоне. Некаторыя наймальнікі пакідаюць аб вакансіі вельмі мала інфармацыі, таму варта паспрабаваць даведацца пра самае асноўнае проста з тэлефоннай размовы. Магчыма, ісці на сумоўе наогул не давядзецца.

Правядзіце экспрэс-аналіз усёй даступнай інфармацыі аб кампаніі да сумоўя. Карысна будзе паглядзець не толькі афіцыйны сайт кампаніі, але і сайты з водгукамі аб працадаўцах (напрыклад - orabote.by, otzyvy.by, галінкі розных мясцовых форумаў). У сацыяльных сетках таксама часта можна знайсці афіцыйныя і неафіцыйныя супольнасці кампаній, там таксама можна знайсці дадатковую інфармацыю, у тым ліку і ад тых людзей, якія цяпер там працуюць.

На сумоўі звярніце ўвагу, наколькі абжытае памяшканне. Калі на працоўных сталах мінімум тэхнікі, няма асабістых рэчаў супрацоўнікаў, а сцены - «голыя», на якіх няма нават календара, то гэта можа гаварыць пра тое, што вы маеце справу з фірмай-аднадзёнкай (калі, вядома, кампанія не змяніла месца размяшчэння нядаўна, пра што можна пацікавіцца).

Падумайце аб тым, дзе вы ўбачылі аб'яву і як даўно яна там была апублікаваная. Вакансія, якая «вісіць» на сайтах з аб'явамі аб рабоце некалькі месяцаў, павінна насцярожыць. Гэта можа казаць пра вялікую цякучку кадраў, пра неадпаведнасць заяўленаму заробку або неадэкватныя патрабаванні кіраўніцтва.

Выгадна будзе адрознівацца аб'ява, у якой дэталёва распісаныя ўсе ўмовы працы, і ёсць інфармацыя аб кампаніі, ад аб'явы, у якой коратка паведамляецца «ўся інфармацыя на сумоўі».

І, вядома ж, наўрад ці можна разлічваць на працу ў сур'ёзнай кампаніі, калі аб'ява аб пошуку супрацоўнікаў вісела на слупе ці паркане.

Калі Вам прапануюць працаўладкаванне за грошы, напрыклад, спачатку аплаціць навучанне, то хутчэй за ўсё перад вамі ашуканцы. Альбо вам прапануюць заняцца нечым вельмі спецыфічным, напрыклад, страхавым брокерствам або распаўсюджваннем касметыкі і БАДаў.

Звярніце ўвагу на тое, як ідзе сумоўе. Існуе методыка стрэсавага сумоўя, калі суіскальніка могуць прымусіць чакаць спецыяліста ў кадрах ці кіраўніка, у працэсе гутаркі з суіскальнікам могуць гутарыць адначасова два чалавекі, ствараючы адчуванне перакрыжаванага допыту. Падчас стрэсавага сумоўя могуць прагучаць разнастайныя пытанні, у тым ліку і асабістага характару (напрыклад - чаму вы не служылі ў войску? Чаму вы не замужам?). Варта задумацца - у якіх варунках вам трэба будзе працаваць, калі вас распытваюць такім чынам.