Навукоўцы: Чыстае паветра можа паскорыць глабальнае пацяпленне

Праз празрыстую атмасферу тэмпература можа падняцца яшчэ на 1,1 градуса.

Зніжэнне выкідаў аэразоляў-забруджвальнікаў можа паскорыць глабальнае пацяпленне.

Міжнародная група навукоўцаў заявіла аб тым, што зніжэнне канцэнтрацыі аэразоляў-забруджвальнікаў у паветры Зямлі можа паскорыць глабальнае пацяпленне, бо такія часціцы з'яўляюцца «экранам», якія адлюстроўвае сонечныя прамяні, што зніжае тэмпературу на планеце. Высновы даследчыкаў былі апублікаваныя ў часопісе Geophysical Research Letters, паведамляе zn.ua.

Адзін з асноўных захадаў, з дапамогай якіх на гэты момант плануецца запаволіць глабальнае пацяпленне - зніжэнне выкідаў парніковых газаў. Даследчыкі ацанілі магчымыя змены з дапамогай чатырох кліматычных мадэляў. У кожнай з іх улічвалася, як зменіцца клімат, калі знізіць выкіды вуглякіслага газу да аб'ёму, які дазволіць утрымаць пацяпленне на ўзроўні 1,5°C. Кожная кліматычная мадэль выкарыстала два сцэнары. У першым колькасць аэразольных забруджвальнікаў - аксіду серы (IV) і тэхнічнага вугляроду - заставалася на цяперашнім узроўні. У другім выпадку іх аб'ём зводзілі да нуля. Паводле звестак розных мадэляў, знікненне аэразоляў «сагрэе» Зямлю на 0,5-1,1°C.

У адрозненне ад парніковых газаў, аэразолі руйнуюцца досыць хутка, таму канцэнтруюцца ў тым жа рэгіёне, дзе патрапілі ў атмасферу. Праз гэта ачыстка паветра мацней за ўсё адаб'ецца на самых забруджаных рэгіёнах, у тым ліку на Усходняй Азіі. Адсутнасць аэразольнага «экрана» ўзмоцніць дажджы, будуць часцей адбывацца кліматычныя катаклізмы - ураганы і цунамі. Пацерпяць і рэгіёны, звязаныя з Усходняй Азіяй атмасфернымі плынямі: Арктыка, а таксама поўнач Еўропы і ЗША.