Аўтамабілі Nissan будуць чытаць думкі кіроўцы і падладжвацца пад яго жаданні

У Японіі пачалі выпрабаванні рэвалюцыйнай тэхналогіі.

Японскія распрацоўшчыкі прыступілі да выпрабаванняў новай тэхналогіі з пазнакай Brain-to-Vehicle (B2V), дзякуючы якой электроніка аўтамабіля зможа інтэрпрэтаваць сігналы мозгу кіроўцы, паведамляе tut.by.

У Nissan разлічваюць, што B2V дазволіць скараціць час рэакцыі кіроўцы, а таксама адаптаваць кіраванне аўтамабіля пад канкрэтны стыль кіравання. У аснове новай тэхналогіі, як кажуць самі распрацоўшчыкі - прагназаванне і выяўленне. Напрыклад, калі кіроўца збіраецца павярнуць стырно, задзейнічаць газ або тормаз, B2V, «прачытаўшы» думкі чалавека, дазволіць выканаць гэтыя дзеянні хутчэй (на 0,2-0,5 секунды).

А яшчэ B2V зможа распазнаць дыскамфорт кіроўцы і змяніць працу сістэм аўтамабіля, зрабіўшы кіраванне больш камфортным - у тым ліку і з дапамогай тэхналогіі дапоўненай рэальнасці для стварэння расслабляльнай атмасферы ў салоне.

Магчымасці новай дапаможнай сістэмы Nissan прадэманструе на выставе спажывецкай электронікі CES у Лас-Вегасе, якая адкрыецца ў канцы гэтага тыдня. Тады даведаемся яшчэ больш падрабязна пра B2V.