Сталіцу ДУФА РФ перанясуць з Хабараўска ва Уладзівасток

У адміністрацыі прэзідэнта РФ падтрымалі ідэю перанесці сталіцу Далёкаўсходняй акругі ва Уладзівасток.

Ініцыятыва пераносу сталіцы Далёкаўсходняй федэральнай акругі з Хабараўска ва Уладзівасток падтрыманая адміністрацыяй прэзідэнта РФ, і найбліжэйшым часам спецыяльная рабочая група будзе накіраваная ў сталіцу Прымор'я для вывучэння ўсіх спадарожных пытанняў, паведаміў часовы выканаўца абавязкаў губернатара Прыморскага краю Алег Кажамяка, паведамляе interfax.ru.

«Ужо была сустрэча з Антонам Эдуардавічам Вайно, кіраўніком адміністрацыі прэзідэнта РФ. Ішла гаворка пра перанос сталіцы ДУФА ва Уладзівасток. Ён сказаў, што найбліжэйшым часам туды накіруецца рабочая група для адпрацоўкі ўсіх момантаў, якія тычацца размяшчэння і ўсіх відаў камунікацыі. Агулам, ён станоўча паставіўся да гэтай ідэі», - сказаў Кажамяка ў сераду журналістам.

На думку часовага выканаўца абавязкаў губернатара на карысць ідэі пераносу сталіцы макрарэгіёна ва Уладзівасток кажа цэлы шэраг фактараў. «Уладзівасток - гэта ўсходняя брама краіны. Безумоўна, тыя праекты, якія сёння з'яўляюцца асноўнымі драйверамі развіцця ўсяго Далёкага Усходу, запушчаныя менавіта ва Уладзівастоку. Праз Уладзівасток ідуць марскія камунікацыі. Там да саміту АТЭС былі пабудаваныя добрыя масты, добрая транспартная лагістыка. Штогод праводзіцца форум (Усходні эканамічны форум). Наяўнасць партоў, інфраструктура - усё гаворыць аб тым, што далёкаўсходняй сталіцы быць ва Уладзівастоку», - сказаў Кажамяка.

Часовы выканаўца абавязку губернатара выступіў з ідэяй пераносу сталіцы ДУФА амаль адразу пасля свайго прызначэння на пасаду кіраўніка Прыморскага краю, якое адбылося 26 верасня, пасля таго, як вынікі губернатарскіх выбараў у рэгіёне былі скасаваныя.