«Плачу ў метро бескантактавай картай, ужо месяц прыходзяць падвойныя спісанні»

Што кажуць распрацоўнікі?

У чытача onliner.by Леаніда - дзве карты, прывязаныя да аднаго рахунку, а таксама смарт-гадзіннік з тэхналогіяй NFS. Пасля таго як у метро з'явілася бескантактавая сістэма аплаты, ён актыўна карыстаецца для праходу як картамі, так і гаджэтамі. Праўда, з пачатку верасня ён стаў заўважаць, што з ягонага рахунку спісваецца падвойная плата.

- Усё адбываецца вось як: я заходжу ў метро, прыкладваю карту або гадзіннік, праходжу - і мне прыходзіць паведамленне аб спісанні грошай, а праз некаторы час — другое, і ў кожным паказаная сума спісання — 65 капеек. Альбо ж, да прыкладу, я толькі адзін раз быў удзень у метро, і пасля паездкі, як звычайна, спісалася 65 капеек, але ўжо бліжэй да ночы, калі я ўжо даўно быў дома, прыйшло СМС аб спісанні 1 рубля 30 капеек — - распавёў Леанід. - Спачатку я думаў, што гэта збой у праграме, і не звяртаў на гэта ўвагі. Але грошы на рахунак не вярталіся.

Леанід кажа, што такім чынам за гэты час з яго спісалі блізу 20 рублёў. Ён зарэгістраваўся ў асабістым кабінеце пасажыра, як і прапануецца на сайце payBYcard.

Але і асабісты кабінет мужчыну не ўзрадаваў. Ён кажа, што ў графе «Дата паездкі» ўсё роўна выявіў лішнія спісанні.

- Я напісаў у тэхпадтрымку, яны абяцаюць разабрацца — - тлумачыць ён. - Акрамя гэтага, звярнуўся ў банк, яны робяць поўную выпіску рахунку. Таксама я напісаў зварот і ў метрапалітэн з гэтай нагоды. Не ведаю, чым скончыцца гісторыя, магчыма, нават спатрэбіцца адсачыць камеры відэаназірання ў метро, каб паглядзець, колькі разоў я ўваходзіў у метро і карыстаўся картай.

У тэхпадтрымцы сэрвісу payBYcard тлумачаць: такі зварот зафіксаваны і цяпер з сітуацыяй Леаніда разбіраюцца. Пры гэтым адзначаюць, што хлопец прывязаў да асабістага кабінета толькі адну карту, хоць для аплаты карыстаўся двума, а таксама гадзіннікам з тэхналогіяй NFС. Магчыма, менавіта праз гэта колькасць спісанняў і названых паездак у асабістым кабінеце не супадае. Ва ўсякім выпадку дакладна высветліць усе нюансы сітуацыі магчыма будзе толькі пасля таго, як банк, карткай якога карыстаецца Леанід, падасць інфармацыю аб спісаннях.

Распрацоўнікі сістэмы payBYcard распавялі аб тыповых сітуацыях, якія ўзнікаюць з пасажырамі, якія карыстаюцца бескантактавай сістэмай аплаты.

Сітуацыя 1. Прыкладваю карту «Белкарт», а яна не спрацоўвае

- Даволі часта пасажыры спрабуюць аплаціць праезд картамі, да прыкладу, сістэмы «Белкарт» альбо ж спрабуюць прыкладаць карты з чыпам ці з магнітнай паласой, — патлумачылі распрацоўнікі. - Але на сёння на валідатары ў метрапалітэне прымаюцца да аплаты толькі бескантактавыя карты двух сістэм — Visa і Mastercard (на карце павінен прысутнічаць спецыяльны значок, які кажа пра тое, што яна бескантактавая). Пры гэтым цалкам усё роўна, які банк выпускае карты гэтай сістэмы.

СІТУАЦЫЯ 2. Прыклаў партманэт з картай, а яна не спрацавала або спісалася паездка з праязнога

— Плаціць у метро чамаданам, барсеткай, партманэтам не рэкамендуецца, - каторы раз паўтараюць стваральнікі payBYcard. - Паводле правілаў метрапалітэна чалавек павінен прыкласці да валідатара той аплатны інструмент, з дапамогай якога хоча, каб адбылася аплата.

Сітуацыя 3. На карце ёсць грошы, але валідатар піша «Адмова»

- Калі карта правільная, а на ёй сапраўды ёсць патрэбныя для аплаты праезду 65 капеек, але тэрмінал усё роўна піша «Адмова», ёсць імавернасць, што вы прыкладваеце і занадта хутка прыбіраеце карту ад валідатара, — тлумачаць у кампаніі. — У сярэднім счытванне карты займае менш за адную секунду. Тут ёсць простае правіла: як толькі на валідатары адлюструюцца чатыры зорачкі, карту можна смела прыбіраць. Далей з'явіцца надпіс «Аплачана», і пасажыр зможа прайсці праз турнікет. Хочам падкрэсліць - гэта адзіны варыянт, калі ў пасажыра будуць спісаныя грошы. Ва ўсіх іншых выпадках спісанне не адбываецца.

Сітуацыя 4. Карта была ў стоп-лісце, грошы прыйшлі, але яе не разблакавалі

Калі на карце няма грошай ці ж іх не стае на аплату праезду, пасажыр зможа прайсці ў метро. Але адразу ж пасля гэтага сістэма ставіць карту ў стоп-ліст, і другі раз у метро па гэтай карце ён не можа патрапіць.

- Чалавек не зможа аплаціць праезд з гэтай карты да таго часу, пакуль з яе не спішуцца грошы, якія ён ужо завінаваціўся метрапалітэну — - тлумачаць распрацоўнікі. - Што адбываецца пасля таго, як карта трапіла ў стоп-ліст? З пэўнай перыядычнасцю сістэма будзе спрабаваць спісаць завінавачанасць. На тэлефон пасажыра могуць прыходзіць СМС-паведамленні з банка аб спробах спісання.

— Мы просім пасажыраў уважліва чытаць змест SMS. Калі ў чалавека доўгі час няма грошай на карце, то пры кожнай спробе спісаць запазычанасць будзе прыходзіць апавяшчэнне пра гэта. СМС будзе ўтрымліваць інфармацыю аб тым, што спісанне не адбылося праз брак сродкаў. Што рабіць чалавеку? У прынцыпе, яму трэба проста папоўніць банкаўскую картку, якой ён скарыстаўся ў метрапалітэне. Калі грашовых сродкаў на ёй будзе дастаткова, яны аўтаматычна спішуцца. Цягам некалькіх банкаўскіх дзён карта будзе выключаная са стоп-ліста, а пасажыр зможа зноў аплачваць праезд у метро банкаўскай картай.

Сітуацыя 5. Замест 65 капеек спісалі больш за 1 рубель

- Калі раней, пры запуску праекта, грашовыя сродкі спісваліся адразу, гэта значыць вы прайшлі - і даслоўна праз пару секунд з вашай банкаўскай карты прайшло спісанне і вы атрымалі пра гэта інфармацыю, то з канца ліпеня гэтага года «БПС-Ашчадбанк» увёў новую функцыю ў гэтай сістэме - гэта функцыя агрэгавання — - тлумачаць у payBYcard. - Што гэта значыць? Гэта значыць, што паездкі агрэгуюцца і цягам 48 гадзін спісваюцца агульнай сумай.

Праўда, спісацца можа толькі 65 капеек, 1 рубель 30 капеек ці ж 1 рубель 95 капеек, не больш, гэта значыць адначасова спісваецца сума максімальна за 3 паездкі, якія здзейсненыя ў прамежак часу, які не сягае 48 гадзін. Стваральнікі сістэмы тлумачаць: ніякіх авансавых плацяжоў сістэма не робіць.

Сітуацыя 6. У метро сёння не быў, але прыйшло паведамленне аб спісанні грошай

- Фармаванне СМС аб спісанні грашовых сродкаў сэрвіс payBYcard не вядзе — - патлумачылі распрацоўнікі. - Яго адсылае банк, які выпусціў банкаўскую карту — і толькі ў тым выпадку, калі ва ўладальніка актываваная паслуга СМС-інфармавання.

- Бывае, што чалавек прайшоў учора ўвечары, сёння раніцай і ў абед. Пасля трэцяй паездкі яму прылятае паведамленне аб тым, што з яго спісалася 1,95 рубля. Пра адсутнасць СМС-паведамленняў аб папярэдніх 2 паездках пасажыр у нашай паўсядзённай мітусні можа не памятаць, і яму здаецца, што гэтая сума спісалася за адну паездку, — распавядаюць у payBYcard. - Стандартная сітуацыя, калі кліенты тэлефануюць, абураюцца, а потым рэгіструюцца ў асабістым кабінеце, і ўсё становіцца на свае месцы. Многія потым нават тэлефануюць і выбачаюцца.

Праверыць усе свае паездкі можна ў спецыяльным раздзеле на сайце payBYcard. Са слоў распрацоўнікаў, зарэгістравацца і прывязаць аплатныя карты там можна за лічаныя хвіліны.

— Мы акцэнтуем увагу пасажыраў на тое, што ў асабістым кабінеце можна пры дапамозе зваротнай сувязі праінфармаваць аб узніклых пытаннях. Тады служба падтрымкі сэрвісу payBYcard больш прадметна зможа разгледзець узніклую сітуацыю і аператыўна на яе адрэагаваць, — робяць выснову распрацоўнікі.