У расейцаў няма грошай на ежу

У той час як Мінпрацы РФ рапартуе пра «беспрэцэдэнтны рост заробкаў», у найбуйнейшых прадуктовых рытэйлераў падаюць продажы.

У трох найбуйнейшых раздробных сетках у РФ - X5, «Магніт» і «Стужка», - за трэці квартал упаў сярэдні чэк у супастаўных крамах, паказвае дырэктар аналітычнага дэпартамента «Лока-Інвест» Кірыл Трэмасаў. Пра гэта піша finanz.ru.

Паводле справаздач па МСФС, апублікаваных за апошні тыдзень, у X5 сума чэка на 0,4% меншая, чым год таму, у «Магніта» - на 0,3%, у «Стужкі» - на 0,2%.

У дзвюх з трох сетак скараціліся і агульныя продажы: на 2% - у «Магніта» і на 0,6% - у «Стужкі».

«Расейцы прадаўжаюць эканоміць, прычым на самым неабходным - прадуктах харчавання», - робіць выснову Трэмасаў.

У двух лідараў - X5 і «Магніта» - адмоўная дынаміка сярэдняга чэка «год да года» назіраецца другі квартал запар. Пры гэтым спажыўцы марнуюць менш нават пры росце коштаў - у трэцім квартале харчовая інфляцыя склала 1,6%.

«То бок, людзі пакідаюць з кожным прыходам у краму крыху менш грошай, набываюць крыху менш ежы або замяняюць прадукты на больш танныя», - канстатуе Трэмасаў.

Актыўнасць спажыўцоў падарвалі чаканні высокай інфляцыі, пенсійная рэформа і абясцэненне нацыянальнай валюты, заявіў у панядзелак падчас тэлеканферэнцыі з інвестарамі гендырэктар «Стужкі» Ян Дзюнінг.

Усё гэта прывяло пакупнікоў у рэжым эканоміі, і сітуацыя пагаршаецца. «За 3 тыдні кастрычніка мы бачым (вынікі) ніжэйшыя, чым у трэцім квартале. Зыходзячы з гэтага, мы думаем, што чацвёрты квартал будзе нават цяжэйшым, чым трэці», - сказаў Дзюнінг (цытаты па Reuters).

«Стужка», з ягоных слоў, «істотна скароціць» колькасць новых крамаў, бо ў існых складаных эканамічных умовах для спажыўцоў дадаваць шмат новых гандлёвых плошчаў рызыкоўна.

X5 Retail Group, якая гандлюе праз сеткі «Скрыжаванне» і «Пяцёрачка», таксама скароціць увод новых гандлёвых пунктаў: летась іх было адкрыта 2,9 тысячы, у гэтым - 2,5, а наступным - 2 тысячы, паведаміла ТАСС фінансавая дырэктарка Святлана Дземяшкевіч у кулуарах дня інвестара.

Агульны прыбытак рытэйлераў расце, але гэта адбываецца за кошт выдушвання з рынку канкурэнтаў па-за сеткай: доля «вялікай тройкі» ў прадуктовым раздробе на канец трэцяга квартала перавысіла 20%.