Эрдаган заявіў пра знаходжанне забойцы Хашкаджы ў Савудаўскай Арабіі

Турцыя перадала аўдыёзапісы з месца забойства журналіста Савудаўскай Арабіі, ЗША, Нямеччыне, Францыі і Брытаніі.

Прэзідэнт Турцыі Раджэп Эрдаган заявіў, што сярод 18 затрыманых чалавек у Савудаўскай Арабіі ёсць забойца журналіста Джамаля Хашкаджы. Пра гэта турэцкі лідар сказаў перад паездкай у Францыю. Ягоныя словы падае РБК са спасылкай на выданне Daily Saba.

Паводле ягоных слоў, Эр-Рыяд ведае, што сярод 15 савудытаў, якія прыбылі напярэдадні знікнення журналіста 2 кастрычніка, ёсць ягоны забойца. «15 чалавек, якія прыбылі ў Стамбул і якія знаходзяцца сярод 18 затрыманых савудаўскімі ўладамі, дакладна ведаюць, хто забіў Джамаля Хашкаджы і дзе ягонае цела. Савудаўская Арабія можа даведацца гэта, прымусіўшы казаць гэтых 15 чалавек», - сказаў Эрдаган. Ён выказаў упэўненасць, што забойца знаходзіцца сярод іх. «Няма патрэбы шукаць яго дзесьці яшчэ», - сказаў турэцкі лідар.

Эрдаган таксама паведаміў, што Турцыя перадала аўдыёзапісы з месца забойства Хашкаджы Савудаўскай Арабіі, ЗША, Нямеччыне, Францыі і Брытаніі. Паводле ягоных слоў, на іх запісаныя «перамовы і ўсё астатняе». Раней крыніца ў турэцкіх уладах паведаміла, што ў Анкары ёсць аўдыёзапіс, на якім чутны момант забойства.

У пачатку лістапада Эрдаган к калонцы для The Washington Post напісаў, што загад аб забойстве Хашкаджы паступіў «з самых высокіх узроўняў» урада Савудаўскай Арабіі. Аднак турэцкі лідар адзначыў, што не верыць у датычнасць да гэтага савудаўскага караля Салмана Аль Сауда.

Калумніст газеты The Washington Post Джамаль Хашкаджы прапаў без вестак 2 кастрычніка пасля таго як увайшоў у генеральнае консульства Савудаўскай Арабіі ў Стамбуле. Цела журналіста дагэтуль так і не знайшлі. У Эр-Рыядзе прызналі, што Хашкаджы мёртвы.

Выданне The New York Times паведамляла, што пяцёра з затрыманых былі звязаны з наследным прынцам Мухамедам Аль Саудам, і як мінімум дзевяць з падазраваных працавалі ў савудаўскіх спецслужбах. Улады Савудаўскай Арабіі ўсе абвінавачванні адмаўляюць.

У кастрычніку выдання Sabah і Hurriyet са спасылкай на крыніцы паведамлялі, што забіць журналіста загадаў высокапастаўлены супрацоўнік выведкі Савудаўскай Арабіі і дарадца наследнага прынца Ахмед Асір, а выконваў загад аташэ савудаўскага генеральнага консульства ў Стамбуле Ахмед Абдула Альмузаіні. Ён перадаў план злачынства консулу Мухамеду аль Утэйбі.