У Японіі арыштавалі кіраўніка альянсу Renault-Nissan-Mitsubishi

Раней Nissan паведаміў пра ўнутраныя расследаванні супраць Карласа Гона.

Пасля допыту японскія следчыя арыштавалі аднаго з самых вядомых мэнэджараў аўтапрама ў свеце, кіраўніка альянсу Renault-Nissan-Mitsubishi Карласа Гона. Пра гэта паведамляюць газета Yomiuri і тэлеканал NHK, піша РБК.

Дагэтуль газета The Asahi Shinbun паведаміла са спасылкай на крыніцы, што Гон будзе затрыманы ў панядзелак, 19 лістапада. Пазней газета расказала, што следчыя ўжо пачалі допыт Гона ў штаб-кватэры Nissan Motor Co. у Ёкагаме, куды яны прыйшлі з ордэрам на ператрус.

Пазней Nissan выпусціла паведамленне, у якім гаварылася, што кампанія ўжо цягам некалькіх месяцаў вяла ўнутранае расследаванне ў дачыненні да Гона і прадстаўнічага дырэктара Грэга Кэлі. Nissan перадала матэрыялы расследавання японскай пракуратуры, і запэўніла ў гатоўнасці супрацоўнічаць са следствам.

Падчас расследавання высветлілася, што Кэлі і Гон цягам многіх гадоў у справаздачах для Такійскай фондавай біржы прыніжалі даходы апошняга. Былі выкрытыя і факты выкарыстання актываў кампаніі ў асабістых мэтах пры суўдзеле Кэлі.

Кампанія прынесла прабачэнні акцыянерам. Радзе дырэктараў прапанавана зняць Гона і Кэлі са сваіх пасадаў.

Паводле звестак сайта investing.com, акцыі Renault у Парыжы раніцай у панядзелак патаннелі амаль на 5%, а пасля паведамленняў аб працягу следчых дзеянняў падзенне курсу акцый кампаніі склала больш за 12%.

Як паведамляе газета The Japan News, Гон з'яўляецца адным з самых высокааплатных мэнэджараў у Японіі. Паводле справаздач, у 2015 годзе ён атрымаў 1,07 млрд ен, у 2016 годзе ягоны заробак склаў 1,09 млрд ен, аднак у справаздачы Nissan за 2017 год фігуравала сума на 33% меншая - блізу 730 млн ен (амаль $6,4 млн ).

Кар'ера Гона пачалася ў Michelin, потым ён перайшоў у Renault, дзе паспяхова вывеў з крызісу амерыканскае аддзяленне кампаніі. У 1999 годзе Гон заняў адну з кіроўных пасад у японскай кампаніі Nissan, якая знаходзілася на мяжы банкруцтва. Пасля зліцця Renault і Nissan Гону ўдалося стабілізаваць становішча і дамагчыся росту асноўных паказчыкаў, ён узначаліў альянс, які пазней набыў яшчэ і пакет акцый Mitsubishi.

У інтэрв'ю Financial Times, пераклад якога апублікавала газета «Ведомости», Гон заявіў, што пасля ягонага прыходу ў Nissan «кампанія ўзляцела як ракета ўжо ў першыя два гады», дзякуючы жорсткім метадам кіраўніцтва, напрыклад, звальненнем нядбайных супрацоўнікаў. «Кампанія была на шляху да банкруцтва, але ўсе выдатна спалі па начах. Я хацеў, каб людзі бралі абавязацельствы, якія б не проста апісвалі, што яны павінны зрабіць, але і ўтрымлівалі гарантыю, што яны зробяць гэта», - распавядаў ён.

Там жа ён падзяліўся сваім меркаваннем аб крытыцы высокіх даходаў топ-мэнэджэраў у Японіі і Францыі. «Узнагароджванне [топ-мэнэджмэнту] пад больш пільнай увагай, чым раней, я спаўна гэта адчуў, - прызнаў Гон. - Вы не сустрэнеце ніводнага гендырэктара, які сказаў бы: мне пераплачваюць. Гэта не мне вызначаць, гэта цалкам кампетэнцыя рады дырэктараў».