Зінаіда Міхнюк: Салідарнасць можа горы звярнуць

Генадзь Фядыніч цяпер з'яўляецца дарадцам-кансультантам прафзвязу РЭП.

Генадзя Фядыніча на пасадзе кіраўніка незалежнага прафзвязу РЭП змяніла Зінаіда Міхнюк. Адпаведную пастанову прынялі сёння на пашыраным пасяджэнні рады РЭП.

Яна стала вымушанай, бо судовая пастанова забараняе Генадзю Фядынічу займаць кіроўныя пасады тэрмінам на 5 гадоў, паведамляе «Радыё Свабода».

Зінаіда Міхнюк кіравала рэгіянальнай прафзвязнай ячэйкай РЭП Берасцейскай вобласці, адначасова з'яўлялася намесніцай Генадзя Фядыніча.

Зінаіда Міхнюк неаднаразова ладзіла прафсаюзныя акцыі ў рэгіёне, накіраваныя на падтрымку правоў працоўных і годныя заробкі. Прайшла праз судовыя штрафы рознай сумы, «зняццё з цягніка» на беларускай мяжы і іншыя пакаранні з боку ўладаў.

Як яна кажа: «Калі б у краіне была такая ж салідарнасць, як у незалежных прафзвязах, то можна было б горы звярнуць. Калі б людзі не былі запалоханыя кантрактамі і ўступалі ў незалежныя прафзвязы, якія рэальна абараняюць правы грамадзян, то пачуццё салідарнасці магло б з'явіцца значна раней. Проста трэба перастаць баяцца».

Як паведамляе tut.by, Міхнюк будзе выконваць абавязкі старшыні прафзвязу да наступнага з'езду арганізацыі ў красавіку 2020 года. Генадзь Фядыніч цяпер з'яўляецца дарадцам-кансультантам прафзвязу РЭП і прадаўжае працаваць у арганізацыі.