Святлана Алексіевіч узнагароджаная першай прэміяй Цэнтральнай Еўропы
3- 22.11.2018, 18:48
- 14,872
Прэмія «Ганаровы грамадзянін Цэнтральнай Еўропы» ўручаецца за ўклад у развіццё дэмакратыі і грамадзянскай супольнасці.
Узнагарода была заснаваная сёлета цэнтральнаеўрапейскім форумам (CEF) - міжнароднай арганізацыяй, якая існуе ўжо дзесяць гадоў. А першай лаўрэаткай прэміі стала нобелеўская лаўрэатка Святлана Алексіевіч, паведамляе pen-centre.by.
Запрашальны ліст падпісаў прэзідэнт Славацкай рэспублікі Андрэй Кіска, які адзначыў важнасць дзейнасці беларускай пісьменніцы. «Ваша прысутнасць на цырымоніі будзе гонарам для народа маёй краіны», - напісаў ён.
У кансультатыўную Раду форуму ўваходзяць такія вядомыя інтэлектуалы, як Міклаш Харасці (Вугоршчына), Славенка Дракуліч (Харватыя), а таксама іншыя еўрапейскія дзеячы культуры і палітыкі.
Цырымонія ўручэння прэміі, прымеркаваная да гадавіны падзей 1989 года ў Чэхаславакіі, прайшла 17 лістапада ў Браціславе на плошчы Славацкага нацыянальнага паўстання. Падчас уручэння быў зачытаны ўрывак з кнігі Святланы Алексіевіч «Час сэканд-хэнд» у перакладзе на славацкую.