Суд прыняў пастанову паводле справы менскай сям'і супраць Міністэрства аховы здароўя

Мама Веры Званько скардзілася на адмову Міністэрства аховы здароўя лячыць дачку за мяжой.

Суд не задаволіў скаргу мянчанкі Марыі Званько супраць Міністэрства аховы здароўя. Мама двухгадовай Веры, у якой рэдкае захворванне, абскардзіла адмову міністэрства ў лячэнні яе дачкі за мяжой, піша tut.by.

Справу Веры Званько разглядалі ў судзе Маскоўскага раёна Менска 11 і 12 снежня. Сёння, 13 снежня, абвясцілі пастанову.

- На жаль, суд скаргу не задаволіў. Мне складана пракаментаваць, чым ён кіраваўся, бо матывы пакуль не агучаныя і мы будзем прасіць скласці матывавальную частку прысуду, - распавёў адвакат Дзмітрый Лаеўскі, які прадстаўляе інтарэсы Веры Званько. - Паколькі скарга не задаволеная, лагічна, што будзе зварот па перагляд у апеляцыйным парадку. А далей - будзем спадзявацца, што гарадскі суд прыслухаецца да аргументаў.

У Веры Званько рэдкае захворванне - спінальная мышачная атрафія II тыпу (СМА). Бацькі звярнуліся ў Міністэрства аховы здароўя з просьбай адправіць дзіця па медыцынскую дапамогу за мяжу, бо ў Беларусі няма прэпарата для прыпынення хваробы. Міністэрства палічыла гэта «немэтазгодным» і вызначыла, што неабходную меддапамогу дзяўчынка можа атрымаць і ў нашай краіне. На гэтыя пастановы мама Веры Марыя Званько і напісала скаргі, бо ў Беларусі прэпарата Spinraza, які, на думку бацькоў патрэбен дзяўчынцы для прыпынення хваробы, няма.

Са свайго боку спецыялісты Міністэрства аховы здароўя адзначалі, што ў краіне ёсць неабходная матэрыяльна-тэхнічная база, а таксама лекары-спецыялісты, якія валодаюць методыкай увядзення згаданага вышэй леку (лекі можна ўводзіць толькі ва ўмовах стацыянара. - Заўвага.). Пры гэтым лекі цяпер у краіне не зарэгістраваныя і могуць быць набытыя за кошт бацькоў або іншых законных спосабаў. Улічваючы гэтыя моманты, камісія Міністэрства аховы здароўя і прыняла пастанову аб немэтазгоднасці накіравання дзяўчынкі па меддапамогу за мяжу.

Прадстаўнік міністэрства казаў, што сёння дзеці з такім дыягназам могуць прайсці рэабілітацыю ў медцэнтрах у Менску, Берасці, Баранавічах, Гомелі, Мазыры. Таксама ЛФК, масаж і фізіялячэнне медыкі могуць праводзіць для такіх дзяцей амбулаторна і на даму.

- Дзяржава затрачвае і гатовая затрачваць сродкі бюджэту. І паверце: затрачваюцца вельмі вялікія грошы пры накіраванні грамадзян і разглядзе пытанняў для надання медыцынскай дапамогі за межамі краіны. Але дзяржава затрачвае грошы на даведзеныя вынікі лячэння. А не прымае пастановы аб накіраванні на падставе аўтарэфератаў. Калі пэўна будзе ўстаноўлена, што лекі Spinraza вылечваюць пацыента, тады, на наш погляд, магчымы разгляд пытання аб накіраванні для надання такой дарагой медыцынскай дапамогі. Мы не ўтойваем - гэта вельмі дорага. Першы год ужывання прэпарата складае амаль 800 тысяч даляраў, кожны наступны і пажыццёва - прыблізна 450 тысяч даляраў, - заяўляў раней у судзе прадстаўнік Міністэрства аховы здароўя.

Адвакат Дзмітрый Лаеўскі падчас пасяджэння суда 12 снежня звяртаў увагу, што без прызнання неабходнасці ў меддапамозе за рубяжом і гэтым прэпараце, арганізацыі могуць адмаўляць сям'і ў дабрачыннай дапамозе.