Bloomberg даведаўся пра прапанаваны РФ узровень скарачэння здабычы нафты

Расея і Савудаўская Арабія разышліся ў ацэнках магчымых аб'ёмаў скарачэнняў.

Чыноўнікі Міністэрстваў энэргетыкі Расеі і Савудаўскай Арабіі сустрэліся ў Маскве, каб абмеркаваць параметры магчымага пагаднення аб абмежаванні здабычы нафты, паведамляе Bloomberg са спасылкай на дасведчаныя крыніцы. Бакі разышліся ў думцы пра тое, на колькі кожная з іх павінна скараціць здабычу, паведамляе РБК.

Сустрэча, паводле звестак агенцтва, адбылася ў канцы мінулага тыдня. Расея прапанавала скараціць здабычу максімум на 150 тысяч барэляў у дзень, але гэта не задаволіла Савудаўскую Арабію. Прадстаўнікі каралеўства намагалі на больш «раўнапраўным партнёрстве» ў рамках магчымай угоды, піша агенцтва.

29 лістапада Reuters, спасылаючыся на дасведчаныя крыніцы, паведаміў пра перамовы Мінэнэрга з расейскімі нафтавікамі, на якіх абмяркоўваліся прапановы Савудаўскай Арабіі аб скарачэнні здабычы агулам на 1 млн барэляў у дзень. Доля Расеі тады б склала блізу 166 тысяч барэляў, але Масква ўважае такое скарачэнне залішнім, паведамляла агенцтва.

У суботу, 1 снежня, прэзідэнт РФ Уладзімір Пуцін сказаў, што падчас сустрэчы з наследным прынцам Савудаўскай Арабіі Махамедам бен Салманам дзве краіны дамовіліся падоўжыць тэрміны дзеяння пагаднення АПЕК+ аб скарачэнні здабычы нафты. Ён падкрэсліў, што канкрэтныя аб'ёмы пакуль не ўзгодненыя.

На фоне гэтых заяў нафтавыя кошты ў панядзелак выраслі. Паводле стану на 18:00 паводле Менску лютаўскія ф'ючэрсы Brent выраслі больш чым на 3,5%, да $61,70 за барэль. Пры гэтым у моманце рост коштаў дасягаў 5%. За лістапад паўночнамарская марка Brent страціла ў кошце больш за 20%.

Арганізацыя краін - экспарцёраў нафты (АПЕК), у якую Расея не ўваходзіць, раіла скараціць сутачную здабычу на 1,3 млн барэляў, пісалі ў суботу Bloomberg і The Wall Street Journal.

Прадстаўнікі АПЕК+ збяруцца 6-7 снежня ў Вене, каб абмеркаваць ўзровень здабычы ў 2019 годзе.

Раніцай у панядзелак пра выхад з картэлі абвясціў Катар, але яго доля ў сумарнай здабычы АПЕК паводле вынікаў мінулага года была меншай за 2%.