Матэуш Маравецкі: «Паўночная плынь-2» можа прывесці да вялікай вайны
1- 15.02.2018, 16:15
- 13,914
Сёння Украіна адносна бяспечная, бо кантралюе газавыя маршруты ў Цэнтральную Еўропу.
Прэм'ер-міністр Польшчы Матэуш Маравецкі заявіў, што «Паўночная плынь-2» стварае новае непатрэбнае напружанне і можа прывесці да вялікай вайны.
Пра гэта ён заявіў у інтэрв'ю Die Welt, піша «Еўрапейская праўда».
Маравецкі падкрэсліў, што сёння Украіна адносна бяспечная, бо кантралюе газавыя маршруты ў Цэнтральную Еўропу.
Са слоў польскага прэм'ера, пасля запуску «Паўночнай плыні-2» і адключэння ўкраінскіх газаправодаў «Расея можа ўсяляк абвастраць канфлікт, можа атакаваць усю краіну. «Паўночная плынь-2» - крок у гэтым кірунку».
Ён адзначыў, што пасля стварэння гэтага газаправода больш імавернай будзе ўспышка вялікай расейска-ўкраінскай вайны.
Са слоў Маравецкага, дзякуючы інтэрканектару і тэрміналаў звадкаванага газу ў Еўропы ёсць дастаткова магчымасцяў, каб забяспечыць попыт на імпартны газ у аб’ёме 180 млрд кубаметраў на год.
«Карацей кажучы: «Паўночная плынь-2» не патрэбная, шкодная, і яна падзяляе заходнюю грамадскасць», - заявіў прэм'ер Польшчы.
Нагадаем, Польшча хоча, каб санкцыі ЗША распаўсюджваліся на будаўніцтва газаправода «Паўночная плынь-2» паміж Расеяй і Нямеччынай.
Праціўнікі праекту «Паўночная плынь-2» - у тым ліку Польшча, краіны Балтыі і Данія - сцвярджаюць, што ён павялічыць залежнасць ЕЗ ад «Газпрома», які ўжо пастаўляе блізу траціны аб'ёмаў газу ў ЕЗ.