Менчукі за дзень раскупілі кватэры коштам $955 за метр

Будынак размешчаны недалёка ад завода «Керамін».

Даволі нечаканы ажыятаж сярод пакупнікоў выклікаў новы дом МАПІДа на вуліцы Пірагова, паведамляе onliner.by.

Здавалася б, кошт за квадратны метр немалы, ды і раён - на вялікага аматара. Аднак учора, у дзень падачы заяў на долевае будаўніцтва, былі разабраныя практычна ўсе кватэры.

Нагадаем, МАПІД будуе на Пірагова двухпад’ездны шасціпавярховы панэльны дом на 47 кватэр. Гэта паўднёвая ўскраіна Менска, раён завода «Керамін». Новабудоўля будзе суседнічаць з пасляваеннымі двухпавярховікамі, прыватным сектарам і чыгункай, а таксама з прамысловай зонай. Цяпер працы ідуць на ўзроўні даху, а здаць дом плануюць у III квартале 2018 года.

З праектнай дэкларацыі, апублікаванай 6 лютага, у продаж паступілі 46 кватэр: 23 аднапакаёвыя плошчай 42,43 кв. м і 23 двухпакаёвыя плошчай 60,51 кв. м. Кошт метра незалежна ад плошчы і паверха - 1900 рублёў, што эквівалентна прыкладна $955. «Аднапакаёўкі» каштавацьмуць 80 617 рублёў (прыкладна $40,5 тыс), «Двухпакаёўкі» - 114 969 рублёў (прыкладна $57,8 тысячы). Ці шмат знайшлося ахвотных? Такое пытанне мы задалі сёння прадстаўніку забудоўшчыка.

- Учора напрыканцы дня заставаліся свабоднымі ўсяго некалькі двухпакаёвых кватэр на першым паверсе. Людзі ішлі цягам усяго дня па жывой чарзе, - распавялі ў МАПІД.

Магчыма, кватэры ў новабудоўлі разабралі у тым ліку супрацоўнікі размешчанага паблізу завода «Керамін».

- Месца працы ў дольшчыкаў мы не пытаем, - адзначылі ў МАПІД. - Мабыць, дом выявіўся запатрабаваным, бо ў гэтым раёне даўно не будавалася новае жыллё.