Чыноўнікі распавялі, чаму расейскі цукар таннейшы за беларускі

Спасылаюцца на сабекошт.

Белдзяржхарчпрам мяркуе, што расейскія вытворцы цукру знаходзяцца ў больш выгадных умовах у параўнанні з беларускімі. Пра гэта старшыня канцэрна Аляксандр Забела распавёў Лукашэнку на Слуцкім цукрарафінадным камбінаце.

Аляксандр Забела спасылаецца на больш нізкі кошт сыравіны і газу.

- У сабекошце прадукцыі 65,9% займае сыравіна - буракі. Паводле вынікаў мінулага года цана буракоў у Расеі склала ад 27 да 37 даляраў за тону - у залежнасці ад рэгіёна. У нас з улікам дастаўкі - 43 даляры. У Расеі самі гаспадаркі дастаўляюць буракі на заводы, - цытуе БелТА.

Таксама кіраўнік канцэрна спаслаўся і на розніцу ў кошце газу, які расейскія прадпрыемствы атрымліваюць па 80 даляраў за тысячу кубаметраў, а беларускія - па 275. Нарэшце, паводле яго інфармацый, адзін з буйных вытворцаў не плаціць ПДВ.

Разам з тым Забела адзначыў і перавытворчасць цукру ў Расеі. У сезоне 2017/18 будзе атрымана больш за 6,2 млн. т цукру. У выніку цукровыя холдынгі скідваюць цану і аддаюць прадукт за бесцань, каб не выдаткоўваць грошы на яго ўтылізацыю.

Белдзяржхарчпрам імкнецца дыверсіфікаваць экспарт цукру. Летась ён пастаўляўся ў 16 краін, пры гэтым доля расейскага рынку знізілася на 23 п.п. да 53,7%. Агульны аб'ём экспарту беларускага цукру склаў 208 млн. даляраў. Лукашэнка выказаў пажаданне прасунуць беларускі цукар у Кітай.