УКБ зноў прапанаваў кватэры ад $856 за «квадрат»

Кватэры размешчаныя на вуліцы Калініна.

Месяц таму УКБ Мінаблвыканкама выставіў на продаж кватэры ў доме, што будуецца на Калінінградскім завулку. Нягледзячы на сярэдні для Менска кошт квадратнага метра - $1200, за некалькі дзён да прыёму заяў каля офіса забудоўшчыка сфармавалася жывая чарга. На 23 кватэры прэтэндавалі больш за 60 чалавек. Каб быць у ліку першых, многія правялі на марозе дзве ночы. І вось 21 лютага УКБ апублікаваў новую праектную дэкларацыю. Гэтым разам кватэры прапануюць выключна чаргавікам, піша «Онлайнер».

- Год пастаноўкі на ўлік не мае значэння, - распавялі ў УКБ. - Для падачы заявы і ўкладання дамовы пры сабе трэба мець пашпарт і даведку, якая пацвярджае стан на ўліку для паляпшэння жыллёвых умоў. Прымаць заявы пачнём з 1 сакавіка.

Паводле цяперашняй дэкларацыі прапануюцца 33 кватэры: 12 аднапакаёвых і 21 двухпакаёвая. Квадратны метр у межах так званай нарматыўнай плошчы (15 кв м на чалавека) каштуе 1 678,92 рубля ($856 паводле курсу Нацбанка), а для плошчы, якая перасягае нарматыўную, - 2 238,56 рубля ($1 140). Важны момант: абавязковай умовай укладання дамовы для чаргавікоў з'яўляецца купля машына-месца на двухузроўневай аўтастаянцы коштам 12 583,53 рубля ($6 413).

Будоўля вядзецца ў старым квартале на месцы зруйнаванага двухпавярховага бараку, за 15 хвілін хады ад станцый метро "Акадэмія навук" і "Парк Чалюскінцаў». 12-павярховы дом будзе маналітна-каркасны, вонкавыя сцены запоўняць керамзітабетонных блокамі. Закончыць работы забудоўшчык плануе ў снежні 2018 года.

У УКБ не змаглі адказаць на пытанне, ці будзе прапанаваная яшчэ адна партыя кватэр для ўсіх ахвотных.