Пінскі АМАП са стральбой затрымліваў п'янага кіроўцу
2- 25.02.2018, 13:40
- 12,273
Кіроўца знаходзіўся ў стане алкагольнага ап'янення.
Паводле інфармацыі УДАІ Берасцейскага аблвыканкама, ноччу 24 лютага супрацоўнікам ДАІ і АМАП, якія дзяжурылі на тэрыторыі Пінскага раёна, паступіла інфармацыя пра тое, што ў напрамку вёскі Пасенічы рухаецца аўтамабіль маркі «Форд Сіера», кіроўца якога, магчыма, знаходзіцца ў стане алкагольнага ап'янення, піша «Медиа-Полесье».
Міліцыянты выявілі падобны прыкметамі аўтамабіль у названай вёсцы на вуліцы Пінскай. Спроба спыніць яго не мела поспеху, кіроўца не рэагаваў на неаднаразовыя патрабаванні спыніцца і прадоўжыў рух на вялікай хуткасці ў напрамку аўтадарогі М-10 «Кобрын – Пінск – Гомель».
Праваахоўнікі ў ходзе пераследу пры дапамозе гучнай сувязі і гукавой сігналізацыі прадаўжалі патрабаваць спынення транспартнага сродку, ніякай рэакцыі не было.
Тады супрацоўнік АМАП для прымусовага спынення аўтамабіля выкарыстаў табельную зброю. Былі зробленыя два папераджальныя стрэлы ў паветра і тры прыцэльныя стрэлы ў колы «Форда», у выніку чаго было прастрэленае задняе левае кола аўтамабіля.
Неўзабаве паблізу вёскі Аснежыцы кіроўца спыніўся і быў затрыманы.
Парушальнікам быў 27-гадовы жыхар аграгарадка Парахонск. Пасля праходжання агляду канцэнтрацыя пароў этылавага спірту ў выдыханым паветры склала 1,73 праміле.
У дачыненні да кіроўцы былі складзеныя тры пратаколы пра адміністрацыйныя правапарушэнні.