Як выглядае напраўду падтрымка мацярынства ў Беларусі

Адкрыты ліст мамы дваіх дзяцей міністру аховы здароўя Валерыю Малашку.

Чаму бясплатныя лекі дзецям да трох гадоў трэба скасаваць. Адкрыты ліст мамы дваіх дзяцей міністру аховы здароўя Валерыю Малашку публікуе «Салiдарнасць».

Майму сыну 2 гады, і, на шчасце, ён рэдка хварэе. Кожны раз, калі мы звяртаемся да ўчастковага педыятра з прычыны хваробы, я адчуваю няёмкасць, нагадваючы лекару аб наяўнасці льготнай карты на лекі. Гэтая карта дае дзіцяці да трох гадоў права на бясплатныя лекі. З моманту нараджэння сына лекары пра яе не ўспомнілі ні разу. Ніхто з іх не прапаноўваў выпісаць лекі льготным рэцэптам. Кожны раз ініцыятыва зыходзіла з майго боку.

Як рэагуюць на гэтую прапанову лекары? Як правіла, спасылаюцца на пералік Міністэрства аховы здароўя і кажуць, што могуць выпісаць самыя танныя беларускія прэпараты: «Але вы ж разумееце, яны не самыя эфектыўныя».

Толькі аднойчы мне ўдалося дамагчыся выпіскі «Парацэтамолу» ўкраінскай вытворчасці ды імпартныя антыбіётыкі. Праўда, чакаць давялося больш за гадзіну, пакуль лекарка выпісала гэтыя рэцэпты. Увесь гэты час мы з хворым дзіцем шпацыравалі каля паліклінікі.

Надоечы пачула ад лекара, што бясплатны рэцэпт сродку ад смаркачоў яна не выпіша, бо не належыць, і наогул, «вы ж дапамогу на дзіця атрымліваеце». Заўважу, што такая рэакцыя была, калі лекарка прызначыла пратаргол, які каштуе капейкі!

Мяркуючы з водгукаў знаёмых мам, у Менску, у адрозненне ад Слуцка, лекары выпісваюць дзецям да трох гадоў большую колькасць прэпаратаў, у тым ліку і імпартных, льготнымі рэцэптамі. Кажу пра гэта лекарцы, і чую ў адказ: «Ну, дык у Менску і бюджэт іншы».

Адкрываю на сайце Міністэрства аховы здароўя пералік прэпаратаў, якія могуць выпісваць дзецям да трох гадоў, і бачу ў пераліку антыбіётыкі і кроплі для носа (нафазалін, ксіламетазалін), супрацьвірусныя сродкі (ацыклавір, рэмантадын)і сіропы ад кашлю, лекавыя сродкі на аснове лактабактэрый, біфідумбактэрый (лінэкс, лактабактэрын, біфідумбактэрын) і нават вітаміны (А, D, В6, В12 і іншыя моновітаміны).

У дакуменце няма ні слова пра тое, што ўсе гэтыя прэпараты выключна беларускай вытворчасці.

Шэсць гадоў таму правадыр падпісаў указ №139, у адпаведнасці з якім дзеці ва ўзросце да трох гадоў атрымліваюць лекі бясплатна.

У дакуменце не гаварылася аб тым, што дзецям, якія жывуць у сталіцы, могуць выпісаць імпартныя прэпараты, а іх аднагодкам, якія нарадзіліся ў райцэнтры, – толькі беларускія.

Тады чаму, каб атрымаць тое, што належыць твайму дзіцяці паводле закону, трэба ісці на канфлікт з лекарам? Мне няёмка бачыць, як добры лекар, які лечыць маё дзіця, пачуўшы пытанне пра бясплатныя лекі, апускае вочы.

І як тут не ўспомніць словы Аляксандра Лукашэнкі, які мяркуе, што «нідзе ў свеце няма такой падтрымкі мацярынства і дзяцінства, як у Беларусі».

Валерый Анатольевіч, ці ведаеце вы, як выглядае карта ўліку льготных лекавых сродкаў, якую выдаюць у дзіцячай паліклініцы мамам дзяцей да трох гадоў? Танюсенькі аркуш паперы, які рвецца, не паспееш да яго дакрануцца.

Вось як выглядае напраўду «беспрэцэдэнтная падтрымка мацярынства і дзяцінства» ў нашай краіне.

У мяне складваецца ўражанне, што лекарам пад пагрозай пазбаўлення прэмій забаранілі выпісваць лекі паводле льготных рэцэптаў. Чым яшчэ можна растлумачыць такія паводзіны – я не ведаю.

Асабіста я бачу два выйсця ў сітуацыі, якая склалася:

1. Скасаваць льготы на лекі для дзяцей да трох гадоў – бо фактычна яны не дзейнічаюць. Здабудуць ад гэтага і мамы, і лекары, якім не давядзецца канфліктаваць з гэтай нагоды.

2. Зрабіць так, каб льгота дзейнічала, і лекары самі прапаноўвалі мамам выпісаць прэпараты, якія патрэбныя іх дзецям. І пры гэтым зыходзілі з прынцыпу эфектыўнасці лячэння, а не яго таннасці для бюджэтнага кішэні.