Няўзораў: Ці дастаткова ў Вагнера байцоў, каб забяспечыць хоць бы гадзіну маўчання Дзяржаўнай думы РФ?

Расейскія найміты, якія загінулі ў Сірыі, прымусілі Дзяржаўную думу РФ маўчаць цэлую хвіліну.

Дзякуючы разгрому 7 лютага наймітаў ПВК "Вагнер" у Сірыі войскамі ЗША Дзяржаўная дума Расеі на хвіліну перапыніла сваю дзейнасць, што станоўча адбілася на краіне. Такое меркаванне выказаў расейскі публіцыст Аляксандр Няўзораў у эфіры радыёстанцыі "Эхо Москвы", піша gordonua.com.

«Забітыя амерыканцамі ў Сірыі «іхтамнеты» прынеслі Расейскай Федэрацыі істотную, адчувальную карысць. Можна сказаць, што яны загінулі не дарма... Як вы ведаеце, Дзяржаўная дума ўвесь час са скуры лезе, каб зрабіць жыццё ў Расеі больш брыдкім, паскудным, безнадзейным і дарагім. Нічога, акрамя праблем і нягод, для жыхароў Расейскай Федэрацыі Дзяржаўная дума не нараджае. Яна генеруе зусім дзікія, фантастычныя радасці практычна кожнае імгненне. Усе яе ініцыятывы загубныя і каштуюць нам вельмі дорага», - распавёў ён.

Публіцыст адзначыў, што кожнае імгненне маўчання Дзярждумы неацэннае.

«Выконваючы рытуал памінання «іхтамнетаў», Дзяржаўная дума ўрачыста маўчала цэлую хвіліну. Вядома, узнікае пытанне: ці дастаткова ў Вагнера байцоў, каб забяспечыць хоць бы гадзіну яе маўчання? Але будзем на гэта спадзявацца», - падсумаваў Няўзораў.

8 лютага 2018 года стала вядома пра авіяўдары кааліцыі ў Сірыі, ахвярамі якога сталі блізу 100 байцоў войска хаўруснікаў прэзідэнта Сірыі Башара Асада.

Крыніцы CBS у Пентагоне паведамілі, што ў Сірыі былі забітыя «расейскія найміты». Даследчая група Conflict Intelligence Team (CIT) мяркуе, што гаворка ідзе пра байцоў ПВК «Вагнер», якая дзейнічае на радовішчах карысных выкапняў у даліне Еўфрату.

Былы «міністр абароны» тэрарыстычнай арганізацыі «ДНР» Ігар Гіркін (Стралкоў) заявіў, што паведамленні пра страты ў Сірыі ўвесь час змяняюцца ў бок павелічэння.

«На сёння дакладна зразумела, што забітых і параненых - рэальна сотні. Некалькі соцень. У астатнім - рознагалоссе. Але апошняя лічба («не канчатковая», як паведамілі) наогул выглядае «завышанай». Нібыта - аж за 600 (644, калі дакладней, - і гэта толькі забітых)», - падкрэсліў ён.

Міністр абароны ЗША Джэймс Мэціс сказаў, што расейская вайсковая групоўка сцвярджала, быццам грамадзян Расеі няма на месцы сутыкнення.

«Як вы ведаеце, мы прыкладаем усе намаганні, каб не ставіць пад пагрозу расейцаў», - падкрэсліў міністр.

Расея адмаўляла прысутнасць сваіх грамадзян на плацдарме ў Сірыі, па якім нанесла ўдар авіяцыя кааліцыі, а затым папрасіла рэжым цішыні, каб забраць сваіх забітых і параненых, пісала газета The Washington Post.

15 лютага ў МЗС РФ заявілі, што ў выніку ўзброенага сутыкнення ў Сірыі загінулі пяць чалавек - меркавана, грамадзян Расеі.