21 верасня 2019, Субота, 2:31
Мы ў адной лодцы
Рубрыкі

Зміцер Бандарэнка: Ёсць сапраўдныя лідары

10
Зміцер Бандарэнка: Ёсць сапраўдныя лідары
ЗМІЦЕР БАНДАРЭНКА

Лідары БНК вартыя бацькоў беларускай Незалежнасці.

Пра гэта Charter97.org заявіў каардынатар грамадзянскай кампаніі «Еўрапейская Беларусь» Зміцер Бандaрэнка, каментуючы затрыманне лідараў Беларускага Нацыянальнага Кангрэсу напярэдадні 100-годдзя абвяшчэння БНР:

- Лукашэнка ахоплены панікай і страхам яшчэ пачынаючы з 2010 года. Лозунгі «Сыходзь!», напалохалі яго падчас падзей «Плошчы-2010», паўтарыліся падчас «дармаедскіх» пратэстаў у мінулым годзе. Толькі гэтым разам з вуснаў ягоных былых прыхільнікаў-пенсіянераў.

Было ясна, што ён моцна перапалохаўся ў мінулым годзе, і гэты страх не пакідае яго цяпер. Менавіта гэтым выклікана затрыманне лідараў Беларускага Нацыянальнага Кангрэсу напярэдадні святкавання 100-годдзя БНР.

- Як вы думаеце, чаму былі затрыманыя менавіта лідары Беларускага Нацыянальнага Кангрэсу?

- Я ўжо казаў, што калі-небудзь 100-я ўгодкі БНР будуць разглядацца гісторыкамі гэтак жа, як абвяшчэнне Беларускай Народнай Рэспублікі. Шмат каму падзеям і людзям будзе дадзеная ацэнка. Ацэнка іх паводзін у сённяшняй сітуацыі, у сённяшнія дні.

Лідары Беларускага Нацыянальнага Кангрэсу сталі арганізатарамі масавых акцый пратэсту ў мінулым годзе, Маршаў абураных беларусаў і леташняга Дня Волі, які так моцна напалохаў улады.

Момант праўды ўжо надышоў. Мы бачым, што ў Беларусі ёсць баязлівыя згоднікі і беларускія героі, ёсць амаральныя тыпы, якія спрабуюць «дастасавацца» да Дня Волі. І адначасова ёсць лідары, якія давялі сваю вернасць і адданасць ідэалам свабоды і Незалежнасці, прайшоўшы праз збіццё, катаванні і турэмныя тэрміны. Гэта такія людзі, як Мікалай Статкевіч, Максім Вінярскі, Уладзімір Някляеў, Вячаслаў Cіўчык ды іншыя.

Можна ўжо сёння казаць, што ёсць, прабачце за выраз, «зісерная» канцэртная апазіцыя і ёсць сапраўдныя лідары. Мы цяпер назіраем і адчуваем біццё пульсу беларускай гісторыі.

- Якой павінна быць рэакцыя на затрыманні лідараў БНК?

- Найбольш смелыя людзі прыйдуць 25 сакавіка а 12:00 на Плошчу Якуба Колaса. А людзі, якія сёння крыху слабейшыя духам - на канцэрт. Як першапачаткова планавалася вялікім аргкамітэтам дэмакратычных сіл, 25 сакавіка ў Менску павінны адбыцца і ўрачыстае шэсце вуліцамі горада, і канцэрт. Тым больш, што галоўная заслуга таго, што канцэрт адбудзецца ў цэнтры сталіцы, належыць тым людзям, якіх улада баіцца больш за ўсё і наважыла пазбавіць свята ў вялікай грамадзе.

Лідары Беларускага Нацыянальнага Кангрэсу, хутчэй за ўсё, правядуць свята за кратамі.

Яшчэ ёсць час, каб праваабарончыя арганізацыі выступілі ў абарону затрыманых, сваё слова сказала міжнародная супольнасць. Магчыма, улады яшчэ адумаюцца, хоць надзеі на гэта вельмі мала.

Беларусы павінны паказаць, што яны маюць волю да свабоды і волю да супраціву, памятаюць пра тых герояў, якія 100 гадоў таму, у вельмі складаных гістарычных і геапалітычных умовах, не пабаяліся абвясціць незалежнасць нашай краіны. Мы ведаем, што за сваю смеласць, мужнасць і паслядоўнасць, айцы БНР заплацілі самую высокую плату.

Сёння лідары БНК паказваюць, што яны вартыя бацькоў-заснавальнікаў беларускай Незалежнасці.