Кіроўца: Нехта вагонамі крадзе - і нічога, а ты падвёз чалавека - і патрапіўся

Чым пагражаюць паездкі ў складчыну і што рабіць, калі патэлефанавалі з падатковай.

Калі ў адным месцы зачыняюцца дзверы, у іншым – адчыняецца акно. У Беларусі гэтая алегорыя тычыцца многіх сфер жыццядзейнасці. Нашым людзям часта даводзіцца шукаць "абыходныя шляхі" ў шмат якіх пытаннях, і часам нават складваецца ўражанне, што менавіта дзякуючы ўменню іх знаходзіць падтрымліваецца нейкі прымальны ўзровень жыцця, піша abw.by:

"Чарговай нагодай для адкрыцця акна ў іншым месцы паслужыла гісторыя з прыватнымі маршруткамі. Ідэя "адрэгуляваць" гэтую сферу і загнаць усіх на аўтавакзалы сустрэла нечаканы супраціў, прычым не толькі з боку ўладальнікаў бізнэсу прыватнага возніцтвам. Вяртацца да былога, як высветлілася, не хочуць і самі пасажыры.

Не чакаючы, чым скончыцца супрацьстаянне прыватных маршрутак і дзяржавы, некаторыя асвоілі "калектыўныя паездкі". Нельга сказаць, што для беларусаў гэта новы спосаб перамяшчэння, але дзякуючы спецыяльным дадаткам шукаць спадарожнікаў, каб падзяліць з імі выдаткі на паліва, сёння стала значна прасцей. Але тое, што даўно і паспяхова працуе ў многіх краінах, у нашай адназначна расцэньваецца як незаконнае вядзенне прадпрымальніцкай дзейнасці. І тыя ж дадаткі сталі інструментам для падатковай.

А надоечы мы даведаліся гісторыю студэнта з Драгічына, якой ён надумаў падзяліцца для навучання тых, хто грэбуе асцярожнасцю і ўпэўнены, што калі няма мэты зарабіць, то і "складу злачынства" быць не можа.

"Я езджу з Драгічына ў Берасце. Раней браў знаёмых, якія давалі грошы на бензін. Да Берасця на цягніку ехаць дзве з паловай гадзіны, а адлегласць гэта 100 кіламетраў, а на аўто за гадзіну і 10 хвілін можна даехаць лёгка. Але не заўсёды са знаёмымі ў нас сыходзіліся графікі, таму адзін чалавек параіў мне зарэгістравацца на BeepCar, што я і зрабіў у канцы лютага. Калі размясціў інфармацыю пра тое, што еду з Берасця, патэлефанаваў маладзён, зарэзерваваў два месцы. Кошт пытання - 4 рублі з чалавека. мне б насцярожыцца, што ў гэтага чалавека няма рэйтынгу, але я падумаў: можа, як і я, пачатковец.

Дамовіліся пра месца сустрэчы. Хлопцам было на выгляд гадоў па 25, я падумаў, што яны таксама студэнты. Селі ззаду, вялі нязмушаную гутарку на адцягненыя тэмы. Я спачатку падумаў, што яны браты, таму што адзін з іх патэлефанаваў на тэлефон, сказаў "тату", што яны ўжо выехалі.

З Берасця мы паспелі ад'ехаць кіламетраў дзесяць, як каля былога прапускнога пункта мяне без бачных на тое прычын спыніў нарад ДАІ. Інспектар стаў правяраць мае дакументы, і тут адзін з хлопцаў выйшаў з аўто, а другі ў гэты час паказаў сваё пасведчанне.

Потым сталі нешта пісаць, афармляць і быццам бы як апраўдваліся, маўляў, нічога асабістага, праца такая. Я спытаў, што мяне чакае. Адказ - на першы раз папярэджанне, але трэба будзе аплаціць нейкі адзіны падатак 80 рублёў. Блізу паўгадзіны ўсё афармлялі, пісалі ад майго імя тлумачальную, сказалі, што будуць праглядаць маю старонку і што наступны раз ужо выпішуць штраф, а падатак павялічыцца ў пяць разоў. Я, вядома, сваю старонку выдаліў. А потым на берасцейскім сайце прачытаў, што не я адзіны трапіў пад раздачу.

Вядома, крыўдна. Хтосьці вагонамі крадзе - і нічога, а ты падвёз чалавека - і ўжо злачынец".

У якасці пацверджання таго, што падатковая сур'ёзна ўзялася за "калектыўныя паездкі", у рэдакцыю даслалі пратакол з Кобрына.

Так званая кантрольная замова - не адзіны метад работы падатковай. Людзі пішуць пра тое, што праз тэлефон, пазначаны на тых жа сэрвісах для пошуку спадарожнікаў, "падазроных" выклікаюць у інспекцыю нібыта на размову. У каментарах да матэрыялу на гэтую тэму карыстальнікі раілі на такія гутаркі проста не хадзіць.

Наша крыніца ў падатковых органах у прыватнай гутарцы паведаміла, што сам па сабе намер узяць спадарожніка не мае складу адміністрацыйнага правапарушэння, але калі ў справе замяшаныя грошы, гэта расцэньваецца як парушэнне арт 22 Грамадзянскага кодэкса Рэспублікі Беларусь і дэкрэта №1. Падатковая адназначна трактуе гэта як прадпрымальніцкую дзейнасць без дзяржаўнай рэгістрацыі, а атрыманыя грашовыя сродкі - як даходы ад такой дзейнасці. І кантрольны заказ, у працэсе якога пераходзіць непасрэдная перадача грошай, з'яўляецца спосабам давесці гэта".