Расея ўзбройвае баевікоў «Талібану»
4- 24.03.2018, 11:03
- 15,608
Пра гэта заявіў галоўнакамандуючы войскамі ЗША ў Афганістане.
Расея ўзбройвае баевікоў афганскага экстрэмісцкага руху «Талібан». Пра гэта ў інтэрв'ю ВВС паведаміў галоўнакамандуючы войскамі ЗША ў Афганістане Джон Нікалсан.
Са слоў генерала, ён сам быў сведкам дзеянняў Расеі па дэстабілізацыі ў Афганістане і запэўнівае, што зброя трапляе ў краіну праз мяжу з Таджыкістанам.
«Мы ведаем гісторыі, расказаныя талібамі СМІ, пра фінансавую падтрымку, якую падае праціўнік. Афганскія лідары прама ў гэты штаб прыносілі зброю, перадавалі яе нам і казалі: «Гэта расейцы перадалі «Талібану», - заявіў Нікалсан.
Ён перакананы, што супрацоўніцтва Расеі і «Талібану» пачалося нядаўна. Расея праводзіла маштабныя вучэнні на афганскай мяжы сумесна з Таджыкістанам.
«Гэта былі антытэрарыстычныя вучэнні, але мы ведаем, як працуюць расейцы: яны транспартуюць вялікую колькасць абсталявання, і частку яго пакідаюць на месцы», - падкрэсліў вайсковец ЗША.
Паводле звестак крыніц у Афганістане, расейская зброю, імаверна, выкарыстоўвалася супраць афганскага войска і інструктараў NATO, якія суправаджаюць салдат пры выкананні некаторых баявых заданняў.
«Актыўнасць стала больш інтэнсіўнай за апошнія 18-24 месяцы. Раней мы не назіралі такой дзейнасці Расеі па дэстабілізацыі. Па часе гэта супадае з ростам інтэнсіўнасці сірыйскага канфлікту», - падкрэсліў Нікалсан.
У 2001 годзе ЗША разам з хаўруснікамі пачалі ў Афганістане аперацыю супраць радыкальнага ісламісцкага руху «Талібан», падставай для якой паслужылі тэрарыстычныя атакі ў Амерыцы 11 верасня. У канцы 2014 года з Афганістана вывелі большасць замежных войскаў. У сувязі з гэтым баевікі «Талібану» істотна актывізавалі атакі.
У лютым 2017 года Нікалсан абвінаваціў Расею, Пакістан і Іран у падтрымцы талібаў і павелічэнні свайго ўмяшання ў вайсковыя дзеянні ў Афганістане, што, на яго думку, значна ўскладняе задачу для ЗША і ўладаў Кабула ў барацьбе з тэрарызмам. На прэс-канферэнцыі 24 красавіка ў Кабуле Нікалсан не стаў адмаўляць факты паставак расейскай зброі талібам.