ВВС: На 100-я ўгодкі БНР прайшлі масавыя арышты ў Менску
6- 25.03.2018, 17:01
- 17,854
Сусветныя СМІ адрэагавалі на брутальныя затрыманні ў Дзень Волі.
У Беларусі затрымалі больш за 100 грамадзян, якія планавалі ўзяць удзел у несанкцыянаваным маршы з нагоды 100-годдзя з абвяшчэння Беларускай Народнай Рэспублікі.
Пра гэта паведамляюць апазіцыйныя беларускія інтэрнэт-выданні, паведамляе ВВС.
Дакладная колькасць затрыманых невядомая.
Як паведаміла ў сетцы Facebook адна з апазіцыйных актывістак Алёна Тоўстая, большасць затрыманых трымаюць у двары аднаго з раённых аддзелаў.
Акрамя таго, раніцай арыштавалі на 10 дзён беларускага апазіцыянера Мікалая Статкевіча. Статкевіч таксама планаваў узяць удзел у акцыі «Дню волі» ў цэнтры Менска і толькі што выйшаў з дома, як быў затрыманы паводле абвінавачвання за ўдзел у незаконнай акцыі восенню мінулага года. Праваабаронцы паведамілі, што напярэдадні таксама праходзілі арышты іншых палітычных актывістаў у розных рэгіёнах Беларусі.
Што азначае дата 25 сакавіка?
9 сакавіка 1918 была абвешчаная Беларуская Народная Рэспубліка, а крыху пазней 25 сакавіка і яе незалежнасць.
10 снежня Чырвоная армія заняла Менск, а да сярэдзіны лютага 1919 па ўсёй тэрыторыі Беларусі зноў усталявалася ўлада бальшавікоў.
Але абвяшчэнне БНР стварыла гістарычны прэцэдэнт і паслужыла асновай для стварэння незалежнай беларускай дзяржавы ў 1991 годзе.
Святкаванне 25 сакавіка, таксама вядомае як «Дзень Волі», аднавілася ў 1989 годзе, але не стала дзяржаўным святам.
Замест гэтага ўлады абралі для афіцыйнага дня незалежнасці 3 ліпеня - дату вызвалення Менска ад нямецкіх войскаў у 1944 годзе.
У Беларусі святкавання 25 сакавіка звычайна праводзіцца ў форме пратэстных акцый і часта заканчваюцца вулічнымі сутыкненнямі і арыштамі.
У 1996 годзе ў «Дзень Волі» на вуліцы Менска выйшлі блізу 30000 чалавек.
У 2000 годзе ўлады выкарыстоўвалі супраць мірнай дэманстрацыі вайсковую тэхніку і падраздзяленні АМАП.
Стагоддзе БНР
У адрозненне ад звычайнага сцэнару, сёлета ўлады пайшлі на некаторыя саступкі.
25 сакавіка дазволілі мітынг і канцэрт у цэнтры Менска каля Опернага тэатра.
Больш за тое, дазволілі выкарыстоўваць незарэгістраваныя нацыянальныя бел-чырвона-белыя сцягі і герб «Пагоня» з выявай рыцара, які часта выкарыстоўваюць беларускія апазіцыянеры.
Напярэдадні ў некалькіх месцах адкрылі памятныя дошкі, прысвечаныя 100-годдзю БНР.