17 кастрычнiка 2018, Серада, 15:28
Нам патрэбна ваша дапамога
Рубрыкі

Крэйг Вудкрафт: Словы Курыльца на 100 адсоткаў хлусня

6
КРЭЙГ ВУДКРАФТ
ФОТА: PRESSBALL.BY

Канадзец мяркуе, што ягоную рэпутацыю зневажаюць, і мае намер звярнуцца да юрыстаў.

Крэйг Вудкрафт пакінуў менскае «Дынама» мінулым летам, але кіраўніцтва «зуброў» усё ніяк не забудзе яго. На суботняй прэс-канферэнцыі, прысвечанай вынікам сезона, гендырэктар клуба Анатоль Курылец зноў згадаў Крэйга, прычым казаў зусім не пра ягоны трэнерскі геній. Курылец мякка намякнуў на непрыстойнасць коўча і падкрэсліў, што канадзец вёў у Менску двайную гульню - удзельнічаў у перамовах з «Серветам», маючы на руках шматгадовы кантракт з «Дынама».

Рэакцыя канадца не прымусіла сябе чакаць. У сітуацыі паспрабаваў разабрацца Тарас Шчыры з «Трибуны».

Вудкрафт, вядомы па працы з нашай нацыянальнай камандай, перабраўся ў «Дынама» па пратэкцыі коўча нацыянальнай каманды Дэйва Льюіса вясной 2016 года, падпісаўшы з клубам трохгадовы кантракт. У Крэйга быў дакладны план: ён збіраўся прышчапіць камандзе агрэсіўны хакей на максімальна высокіх хуткасцях і стварыць калектыў, які з часам змог бы змагацца за Кубак Гагарына. І ўжо першы сезон атрымаўся вельмі нават нядрэнным. Пасля рэгуляркі «зубры» занялі пятае месца ў сваёй канферэнцыі і чацвёртым разам у гісторыі выйшлі ў плэй-оф, дзе, праўда, адразу ж саступілі больш мацёраму яраслаўскаму «Лакаматыву» - 1-4.

Нягледзячы на гэта, куратар клуба Ігар Шуневіч працай Вудкрафта застаўся задаволены і выявіў жаданне прадоўжыць з ім супрацоўніцтва. Але ў міністра МУС было некалькі пажаданняў, якія ён агучыў на пачатку мінулага чэрвеня. Па-першае, у камандзе павінна скараціцца колькасць легіянераў, а па-другое, асістэнтамі Вудкрафта павінны стаць беларусы.

Прыкладна ў гэты ж час швэйцарскае выданне Tribune de Geneve апублікавала навіну пра тое, што Крэйг узначаліць «Сервет» з Жэневы. Гэтую інфармацыю ніхто не пацвярджаў, але і не аспрэчваў. Была падобная яна на нейкі слых, але 23 чэрвеня Вудкрафт нечакана для многіх «Дынама» пакінуў і праз тры дні падпісаў пагадненне з «Серветам».

На сыход трэнера адразу адрэагаваў генеральны дырэктар Курылец. Ён у ветлівай манеры падзякаваў Вудкрафту за працу ў клубе, але прызнаўся, што пастанова коўча пакінуць Менск стала нечаканай.

Сам Вудкрафт не надта гаварыў адкрыта. Ён толькі сказаў, што здзіўлены жаданнем клуба расстацца з легіянерамі, а яны разам з замежнымі трэнерамі былі «ключавымі элементамі сістэмы» клуба. Маўляў, быў план здабыць Кубак Гагарына, аднак клуб пайшоў сваёй дарогай.

Хакейная грамадскасць падтрымала Вудкрафта. Некаторыя спецыялісты ўважалі, што менчукам без добрых замежнікаў у плэй-оф нічога не свеціць.

А хтосьці казаў, што трэнерскі штаб фармаваць павінен выключна галоўны трэнер.

Усе кропкі над «і» наважыў расставіць Шуневіч, заявіўшы пра тое, што Вудкрафт вёў перамовы «за нашай спіной» са швэйцарскім клубам. Тэма надоўга сціхла, і зваротная рэакцыя рушыла ўслед толькі ў лютым 2018 года. У інтэрв'ю беларускай тэлевізіі канадзец сказаў, што размовы аб ягоных перамовах да сыходу з «Дынама» - гэта неабгрунтаваныя плёткі. Не больш таго.

І тут на выніковай прэс-канферэнцыі прарвала Анатоля Курыльца:

- Чытаў інтэрв'ю з Вудкрафтам аб тым, што ягонае звальненне з «Дынама» стала для яго сюрпрызам. Я - афіцэр. Кажу вам шчыра: ён пачаў весці перамовы са швэйцарскім клубам са снежня 2016 - адразу пасля Кубка Шпенглера. Гэтая таямніца стала рэальнасцю ў траўні - мы даведаліся, што Крэйг вядзе падвойную гульню. Давялося весці з ім размову інакш. Ён выставіў непад'ёмныя для клуба ўмовы: узняцце заробку трэнерам амаль удвая (у тым ліку і яму) і дзевяці легіянерам у камандзе. На такое мы не маглі пагадзіцца. І яго цяперашнія апавяданні, што ён увесь з сябе добры...Паверце: гэта не так.

Анатоля Адамавіча было не спыніць. Палкоўнік міліцыі ў запасе нават прыгадаў гісторыю пра тое, як Вудкрафт нібыта набыў за свае грошы падсвечнік у трэнерскую, а потым папрасіў клуб вярнуць два рублі.

Вудкрафта, які проста цяпер разам з «Серветам» удзельнічае ў плэй-оф чэмпіянату Швэйцарыі, спіч Курыльца непрыемна здзівіў. Крэйг кажа, што гэта яго раззлавала:

- Словы Курыльца - гэта няпраўда. Гэта на 100 адсоткаў хлусня. Людзі ў Беларусі павінны ведаць пра гэта. Я быў шчаслівы ў Менску і паважаў кантракт з «Дынама». Я не вёў перамоваў ні з «Серветам», ні з усякай іншай камандай падчас Кубка Шпенглера, і я не прасіў павялічваць колькасць легіянераў да дзевяці ці павялічваць мой заробак. Цяпер у мяне гульні плэй-оф у Швэйцарыі і я хачу сфакусаваць сваю ўвагу на камандзе. Разбяруся з гэтай сітуацыяй пасля заканчэння сезона. Магчыма, звярнуся па юрыдычную кансультацыю, бо гэтыя заявы закранаюць маю асабістую недатыкальнасць і прафесійную рэпутацыю.

Пра тое, што магло заахвоціць Курыльца да такіх выказванняў, Крэйг не сказаў.

У пікіроўцы Курыльца з Вудкрафтам канца пакуль не відаць. Сочым за тым, што будзе далей.