ЗША рыхтуюць забарону на аблігацыі Расеі ды дзяржаўных банкаў

Новыя санкцыі ўдараць па дзяржаўнай запазычанасці і фінансавай сістэме РФ.

Кангрэс ЗША пачаў падрыхтоўку новага пакета фінансавых санкцый супраць Расеі, які радыкальна ўзмоцніць жорсткасць дзейнага санкцыйнага рэжыму.

Адпаведны законапраект падрыхтавалі дэмакрат Хаакін Кастра і рэспубліканец Майк Тэрнер. Яго тэкст размешчаны ў адзінай базе дакументаў ніжняй палаты амерыканскага парламента.

Акт "Аб салідарнасці з Вялікабрытаніяй супраць парушэнняў Расеі" задуманы як адказ на атручванне ў Салсбэры экс-палкоўніка ГРУ Сяргея Скрыпаля, "бессаромныя спробы ўрада РФ парушаць міжнародныя законы" і "расейскую агрэсію" у дачыненні да "дысідэнтаў і дэмакратычных актывістаў".

Законапраект патрабуе поўнай забароны для амерыканскіх фізічных і юрыдычных асоб на ўсялякія аперацыі з расейскай дзяржаўнай запазычанасцю. Пад санкцыі, згодна з дакументам, трапляюць пазыковыя паперы, выпушчаныя Мінфінам Расеі, Цэнтрабанкам або ад iмя Фонду нацыянальнага дабрабыту, якія маюць тэрмін абарачэння болей за 14 дзён.

Ён таксама распаўсюджваецца на аблігацыі 7 дзяржбанкаў, якія прыраўноўваюцца да суверэннай завінавачанасці: гэта Сбербанк, ВТБ, Газпромбанк, Банк Москвы, Россельхосбанк, Промсвязьбанк і ВЭБ.

Зваротнай сілы праект не мае: забараняюцца толькі аперацыі з паперамі, выпушчанымі пасля ўваходжання санкцый у дзеянне (праз 180 дзён з моманту прыняцця закона).

Дакумент таксама патрабуе ўзмацнення жорсткасці санкцый супраць саміх дзяржбанкаў: блакуюцца ўсе аперацыі з кожнай з сямі крэдытных арганізацый, уключаных у "чорны спіс".

Забараняюцца таксама ўгоды з іх актывамі (у тым ліку якія знаходзяцца ў долевай уласнасці), якія знаходзяцца на тэрыторыі ЗША ці кантралююцца амерыканскай юрыдычнай асобай.

У адрозненне ад папярэдняга санкцыйных закона, што быў прыняты ў жніўні і таксама ўключаў магчымасць санкцый у дачыненні да расейскай дзяржаўнай завінавачанасці, новы дакумент значна больш жорсткі.

Згодна з CAATSA, Мінфіну ЗША толькі было даручана разгледзець магчымасць забароны на ўкладанні ў расейскія дзяржаўныя аблігацыі. Ведамства ў пазначаны тэрмін - за паўгода - падрыхтавала даклад, у якім паведаміла, што такі крок немэтазгодны без падтрымкі з боку ЕЗ: калі ў еўрапейскіх інвестараў захаваецца магчымасць купляць высокапрыбытковую дзяржаўную запазычанасць РФ, гэта паставіць амерыканскія банкі і фонды ў нявыгаднае становішча.

Новы ж дакумент не дапускае альтэрнатыў: прэзідэнт ЗША "абавязаны" ўвесці санкцыі ў выпадку яго прыняцця, гаворыцца ў тэксце.

Паводле звестак ЦБ, нагадаем, замежным інвестарам належыць 34% усіх аблігацый федэральнай пазыкі на агульную суму 2,27 трыльёна рублёў. З пачатку 2016 года нерэзідэнты ўклалі ў АФЗ блізу 20 млрд даляраў, купіўшы на рынку больш за трыльён рублёў.

"Калі ўвесь спекулятыўны капітал раптам развернецца, то мы будзем назіраць тыя ж падзеі, якія адбываліся ў лістападзе-снежні 2014 года», - кажа начальнік аддзела брокерскіх аперацый РасЕўраБанка Яўген Волкаў.

Гэтыя асцярогі рэалізуюцца ўжо цяпер, паказвае аналітык "Адкрыццё Брокер" Андрэй Качаткоў. За панядзелак і дзве гадзіны гандлю аўторка каціроўкі найбольш ліквідных пазыковых папер ўрада Расеі ўпалі рэкордна са студзеня 2016 года. Індэкс коштаў АФЗ - RGBI - страціў 3 пункты, курс даляра ўзляцеў больш чым на 5 рублёў: у пятніцу таргі закрыліся на адзнацы 58,1750 рубля за даляр, а ў аўторак угоды здзяйсняліся ўжо паводле 63,95 рубля. Курс еўра дасягаў 78,77 рубля.

Гэты сумны сцэнар паўтараецца не першы раз: расейскі валютны рынак напампоўваюць гарачым спекулятыўным капіталам, надзімаецца бурбалка, якая лопаецца, і спекулянты бягуць назад, купляючы даляры - гэтак жа праходзіла шалёная дэвальвацыя ў 1998м, 2008м і 2014м гадах, нагадвае загадчык аддзела міжнародных рынкаў капіталу Інстытута сусветнай эканомікі і міжнародных дачыненняў РАН Якаў Міркін.