Што чакае беларускі рубель, які пачаў падзенне

Ці пачнецца «валютная ліхаманка» каля абменнікаў?

Як доўга будзе падаць рубель - пра гэта старшы аналітык Альпары Вадзім Ёсуб распавёў у каментары «Заўтра тваёй краіны».

- Відавочная прычына зніжэння беларускага рубля да кошыка валют ляжыць па-за Беларуссю - гэта дынаміка расейскага рубля да даляра і еўра. Рубель ужо трэці дзень падае пад уздзеяннем санкцый, прынятых яшчэ ў мінулую пятніцу, - кажа экспэрт. - Калі ў першыя два дні - панядзелак і аўторак - беларускі рубель нават умудраўся ўмацоўвацца да валютнага кошыка, то ў сераду крыху знізіўся. Рост даляра і еўра апярэджваў зніжэнне расейскага рубля.

Але, агулам, падкрэслівае фінансавы аналітык, кошт кошыка цяпер знаходзіцца паблізу ўзроўню пачатку года, а гэта значыць, што «з пачатку года з беларускім рублём не адбылося нічога».

Валютны кошык дазваляе комплексна ацэньваць беларускі рубель. Еўра, даляр і расейскі рубель уваходзяць у яго таму, што гэта асноўныя валюты беларускага замежнага гандлю. У расейскага рубля ў кошыку 50%, у даляра - 30% і ў еўра - 20%.

- Кошык - гэта як тэрмометр для вызначэння тэмпературы, яна паказвае змяненне курсу беларускага рубля ў сітуацыях, калі курсы даляра, еўра і расейскага рубля змяняюцца мала таго што па-рознаму, але нават у розныя бакі, - тлумачыць экспэрт.

З нагоды імклівага зніжэння курсу беларускага рубля да еўра і даляра ў сераду Вадзім Ёсуб робіць некалькі здагадак.

- Першае - дзеянне цяперашніх санкцый, якія былі зробленыя ў першую чаргу супраць Алега Дзерыпаскі і «Русала» ў мінулую пятніцу, хутчэй за ўсё, рынкам ужо адыгралі. Гэта значыць, далей падаць расейскаму рублю, адпаведна, і беларускаму ў дачыненні да даляра і еўра з гэтай нагоды чыннікаў ужо няма, - мяркуе экспэрт.

З іншага боку, даслоўна днямі прэзідэнт ЗША Дональд Трамп анансаваў увядзенне новых санкцый у дачыненні да Расеі праз яе датычнасць да хімічных нападаў у Сірыі.

- Без новых санкцый можна было б чакаць, што ўжо найбліжэйшым часам рост даляра і еўра спыніцца, і, хутчэй за ўсё, пачнецца рух у адваротны бок. Але як толькі ў дачыненні да Расеі будуць прынятыя новыя санкцыі, гэты сцэнар ламаецца, даляр і еўра прадоўжаць свой рост, - ацэньвае Вадзім Ёсуб.

З упэўненасцю сказаць, калі будуць прынятыя новыя санкцыі, якімі менавіта яны будуць, на якія персаналіі і супраць якіх кампаній будуць накіраваныя, якія дэталі рэалізацыі гэтых санкцый, немагчыма. Вось чаму складана адказаць на пытанне аб далейшых перспектывах курса даляра і еўра да беларускага рубля.

- Важна разумець, што ў гэтай сітуацыі як гэта ні парадаксальна гучыць, але ледзь не адзіны чыннік, які вызначае курс даляра да беларускага рубля, - гэта магчымыя новыя санкцыі ЗША ў дачыненні да Расеі, - падкрэслівае экспэрт.

Беларускае насельніцтва даволі працяглы час застаецца чыстым прадаўцом валюты. Ці не зменіць гэтая сітуацыя паводзіны беларускіх грамадзян і ці не кінуцца яны купляць валюту?

Экспэрт у гэтым моцна сумняваецца.

- Рэч нават не ў тым, у якім кірунку рухаецца валюта, а ў тым, адкуль узяць сродкі для куплі валюты, - кажа Вадзім Ёсуб. - У насельніцтва практычна няма лішніх грошай. Вось чаму нават нягледзячы на гэты скачок курсаў, які мы назіралі ў апошнія дні, паводзіны насельніцтва на валютным рынку наўрад ці кардынальна зменяцца.