Мянчук: Тэрмінал праглынуў 470 рублёў і завіс, банк прапанаваў заплаціць яшчэ

Выплата крэдыту сталася для жыхара сталіцы прыгодай.

У мінулую суботу мянчук Дзяніс звыкла адправіўся ў аддзяленне банка, каб чарговым разам выняць з кішэні 470 рублёў за крэдытную кватэру, піша onliner.by.

Мужчына ўвёў неабходныя звесткі, уставіў грошы ў купюрапрыёмнік, пасля чаго машына завісла. Аплата, натуральна, не прайшла, а грошы засталіся дзесьці ўсярэдзіне. З тэхнікай такое бывае, у гэтым, магчыма, няма нічога страшна. Але ўстурбавала мужчыну іншае: прапанова супрацоўнікаў заплаціць грошы яшчэ раз.

Са слоў Дзяніса, ні чэка, ні іншага пацверджання аплаты апарат не даў - проста забраў грошы і ніяк не адрэагаваў. Мужчына тут жа звярнуўся да супрацоўнікаў банка з просьбай развязаць ягоную праблему. Яму прапанавалі напісаць заяву і, з ягоных слоў, далі не зусім звычайную параду.

- Я сеў пісаць заяву і папрасіў растлумачыць, як праца будзе весціся далей. У адказ супрацоўніца банка сказала, што адказ на маю заяву мне пададуць толькі праз 30 дзён, а цяпер мне лепш заплаціць яшчэ раз - каб не псаваць сабе крэдытную гісторыю. Гэта значыць праз іх памылкі я павінен быў дастаць з кішэні яшчэ 470 рублёў і зноў заплаціць, а потым яшчэ і чакаць месяц, пакуль яны ўсё правераць. Хіба гэта такая складаная задача - праверыць тэрмінал? На гэта і сапраўды патрэбна 30 дзён? - здзіўляецца мужчына.

Тэрмін аплаты ягонага крэдыту мінае ўжо праз некалькі дзён, і цяпер Дзяніс не ведае, як яму быць.

Па каментар мы звярнуліся ў «БПС-Сбербанк», дзе растлумачылі сітуацыю: паміж кліентам і прадстаўніком банка, магчыма, узнікла непаразуменне.

- Мы засмучаныя, што ў нашага кліента пры выкананні аперацыі паўсталі складанасці. Банк надае асаблівую ўвагу забеспячэнню бесперабойнага і карэктнага функцыянавання сеткі прылад самаабслугоўвання, сістэматычна ажыццяўляючы маніторынг працаздольнасці абсталявання.

У названай сітуацыі паўторная аплата не патрабуецца, дастаткова напісаць заяву, тэрмін яе разгляду ў адпаведнасці з дзейным заканадаўствам складзе не больш за 15 дзён, а звароты, якія патрабуюць дадатковага вывучэння і праверкі - не больш за месяц з дня падачы. Звычайна такія заявы разглядаюцца ў тэрмін да 15 дзён. Да 30 дзён тэрмін падаўжаецца толькі ў крайнім выпадку - калі на тое ёсць важкія падставы, якія патрабуюць дадатковай праверкі.

У апісанай сітуацыі ўстанавіць факт аплаты было нескладана. Такім чынам, унесеныя грашовыя сродкі ўжо паступілі на адпаведны рахунак, пра што кліент будзе праінфармаваны дадаткова.

Акрамя таго, пры ўзнікненні такіх сітуацый банк заўсёды ідзе насустрач кліенту, улічваючы ў праграмных комплексах менавіта дату фактычнага ўнясення грашовых сродкаў пры дапамозе прылады самаабслугоўвання, і, як вынік, інфармацыя негатыўнага характару не адлюстроўваецца ў крэдытнай гісторыі кліента, - пракаментавалі ў прэс-службе.