Пайшоў з жыцця актор, які выконваў ролі ў фільмах пра Гары Потэра і Осціна Паўэрса
- 22.04.2018, 10:28
- 11,724
Верн Троер быў найбольш вядомы па ролі Міні-Мы.
Ва ўзросце 49 гадоў памёр амерыканскі актор, стэндап-комік і каскадзёр Верн Троер пасля хваробы, паведамілі сябры сям'і артыста на яго старонцы ў Instagram, паведамляе РБК.
«З вялікім смуткам і невыказна цяжкім сэрцам паведамляем, што Верн сёння сышоў», - гаворыцца ў паведамленні.
Як вынікае з подпісу да допісу, у свае апошнія дні, праведзеныя ў асяроддзі сямейнікаў, ён хрысціўся. Сям'я згадала, што актор «на працягу многіх гадоў змагаўся і перамагаў, змагаўся і перамагаў, аднак гэтым разам - занадта шмат». «Дэпрэсія і суіцыд - вельмі сур'ёзныя праблемы», - гаворыцца ў допісу без тлумачэнняў, што менавіта мелася на ўвазе пад гэтымі словамі.
Як паведамляе выданне TMZ, актор быў шпіталізаваны ў пачатку красавіка праз атручванне алкаголем, яго жыццё апошнім часам падтрымлівалася з дапамогай адмысловай медыцынскай апаратуры. Паводле звестак TMZ, Троер меў неаднаразовыя праблемы з ужываннем алкаголю і прайшоў некалькі курсаў рэабілітацыі ад гэтай залежнасці.
Троер нарадзіўся з генетычным захворваннем - ахондраплазіяй, якое прывяло да карлікавасці за кошт недаразвіцця доўгіх костак. Яно выклікаецца, як паказалі нядаўнія даследаванні, мутацыяй гену, што адказвае за гармон росту, аднак развязанне гэтай праблемы пакуль не знойдзенае. У кіно Троер пачаў здымацца ва ўзросце 25 гадоў - у 1994 годзе.
Яго дэбютам стала роля ў фільме «Немаўля на прагулцы», дзе ён быў дублёрам 9-месячнага дзіцяці. Да 1999 годзе Троер працаваў у асноўным дублёрам і каскадзёрам, гуляў у эпізадычных ролях. Вядомы ён стаў пасля ролі Міні-Мы ў камедыйным фільме «Осцін Паўэрс: Шпіён, які мяне спакусіў».