Індыя пазбавіла Расею Су-57
16- 23.04.2018, 11:55
- 37,029
Індыйская старана мяркуе, што створаны расейскі знішчальнік не адпавядае сучасным патрабаванням.
Індыя выйшла з супольнага з Расеяй праекта FGFA (Fifth Generation Fighter Aircraft), які прадугледжвае стварэнне на аснове Су-57 першага індыйскага знішчальніка пятага пакалення. Пра гэта індыйская старана, якая ўключае дарадцу ў нацыянальнай бяспецы Аджыт Давала і міністра абароны Санджатэ Мітру, апавясціла расейскую старану, паведамляе Janes (пераклад - lenta.ru).
Прычынай згортвання 11-гадовай праграмы ВПС Індыі называюць непераадольныя разыходжанні ў тэхналагічных і фінансавых пытаннях. Між тым, у перспектыве індыйская старана дапускае перагляд пагаднення аб FGFA, а таксама не выключае куплю гатовых Су-57 у выпадку, калі Расея задаволіць патрабаванні Індыі.
Індыйскія вайскоўцы мяркуюць, што створаны расейскі знішчальнік не адпавядае заяўленым патрабаванням схаванасці. Таксама індыйская старана мяркуе, што баявая авіёніка, радары і датчыкі расейскай распрацоўкі не адпавядаюць стандартам баявога самалёта пятага пакалення.
Праграма FGFA стартавала ў 2007 годзе, яе асноўнымі выканаўцамі сталі «Сухой» з расейскай стараны і Hindustan Aeronautics з індыйскай. Краіны дамовіліся аб стварэнні знішчальніка пятага пакалення на базе расейскага Су-57. У рамках першага этапу праграмы коштам 295 мільёнаў даляраў быў распрацаваны дызайн індыйскага знішчальніка, але далей праект FGFA не рушыў праз мноства супярэчнасцяў, што ўзніклі паміж старанамі.
Расея разглядала партнёрства з Індыяй аб стварэнні знішчальніка пятага пакалення ў якасці асноўнай крыніцы фінансавання серыйнага выпуску Су-57. У красавіку 2018 года паведамлялася, што Расея закончыла мадэрнізацыю састарэлага рухавіка для Су-57.