Лапаць у космасе

Вось ён - пуцінскі «адказ Амерыцы».

«61% расейцаў уважаюць Расею за лідара ў асваенні космасу («Левада-цэнтар», апытанне сакавіка 2018). Пры гэтым аб запуску прыватнай амерыканскай кампаніяй SPACE-X Ілона Маска звышцяжкай ракеты ведалі 2% апытаных, а ўпершыню пра гэта пачулі 62%», - піша тэлеграм-канал «Сярпом Па».

«Іншае сакавіцкае апытанне «Левада-цэнтра» паказала, што для 85% грамадзян крыніцай навін пра краіну і свет з'яўляецца тэлевізія. Таму нядзіўна, што пуцінская Расея - яўны аўтсайдэр асваення космасу, уяўляецца большасці грамадзян, як кажа ТБ прапаганда, - лідарам.

Людзям бясконца расказваюць пра поспехі СССР паўвекавой даўнасці, у 60-70-я гады мінулага стагоддзя, але не гавораць праўду аб сучаснасці - Расея адстала ў космасе на пакаленні.

Касмічны тэлескоп «Хабл», мікрахвалевы зонд Уілкінсан, інфрачырвоныя арбітальныя тэлескопы «Спітцэр» і «Гершэль», амерыканскія марсаходы, якія амаль 15 гадоў засвойваюць Марс, місіі да Сатурна, Юпітэра, Плутону. Дзе тут Расея?

Прарываў няма. Затое ёсць размаляваны Раскосмасам агітацыйны рэтра-цягнік у маскоўскім метро з савецкімі плакатамі 60-х, партрэтамі Гагарына і Каралёва і бадзёрымі лозунгамі: «Павер у мару!», «Падымі галаву!».

Падымем галаву. Што мы бачым там, у вясновым небе? Што там за мара?

Толькі што NASA запусціла з дапамогай ракеты ўсё той жа SPACE-X тэлескоп TESS, задача якога шукаць за межамі Сонечнай сістэмы планеты, дзе магчымае жыццё (першыя такія планеты былі адкрытыя, дарэчы, таксама не расейскімі навукоўцамі). Чакаецца, што TESS зможа выявіць 2-3 тысячы новых планет.

І тут жа навіна, якая прыйшла адразу пасля Дня Касманаўтыкі: выраблены РКК «Энергія» і запушчаны нядаўна Раскосмасам першы ангольскі тэлекамунікацыйны спадарожнік «Ангосат-1» не падлягае аднаўленню. Чатыры месяцы з ім спрабавалі ўстанавіць сувязь і ўсё беспаспяхова.

Вось ён - пуцінскі «адказ Амерыцы». Бессэнсоўны жалезны «лапаць» у космасе коштам некалькі соцень мільёнаў даляраў».