Жыхарка Польшчы кінулася ў раку за сабакам і апынулася ў Беларусі
4- 23.04.2018, 20:37
- 20,047
Грамадзянка Польшчы пераплыла Заходні Буг.
Беларускія памежнікі затрымалі грамадзянку Польшчы, якая ратавала сабаку і апынулася ў нашай краіне.
31-гадовая жанчына пераплыла раку Заходні Буг і парушыла дзяржаўную мяжу.
Як інфармуе прэс-служба Дзяржаўнага памежнага камітэта Беларусі, здарэнне адбылося 20 красавіка. Польскія памежнікі паінфармавалі беларускіх калегаў, што жанчына магла нелегальна перайсці мяжу. Бераг ракі абследавала трывожная група, якая і знайшла парушальніцу.
Жанчына распавяла, што ад яе збег сабака, які апынуўся ў Заходнім Бугу. Яна кінулася за ім і спрабавала выцягнуць жывёлу з вады. Аднак польку падхапіла моцная плынь і аднесла яе на беларускі бок ракі.
Грамадзянцы Польшчы аказалі неабходную дапамогу. Пасля складання дакументаў аб парушэнні рэжыму мяжы і правілаў знаходжання, жанчыну адправілі на радзіму.