Гамельчукі хочуць ушанаваць першую беларускую міністарку

Жыхары Гомеля накіравалі некалькі сотняў подпісаў за ўстаноўку мемарыяльнай шыльды Палуце Бадуновай.

У сакавіку 2018 гадоў у Гомелі адбылася гістарычная вечарына ў гонар 100-годдзя абвяшчэння Беларускай Народнай Рэспублікі (БНР), пішуць «Моцныя навіны». Па выніках сустрэчы ўстанова «Цэнтр рэгіянальнага развіцця ГДФ» і гомельскае аддзяленне «Таварыства беларускай мовы імя Ф Скарыны» выступілі з прапановай усталяваць мемарыяльную шыльду першай беларускай міністарцы, намесніцы старшыні Народнай Рады БНР.

Пад петыцыяй падпісаўся 231 чалавек, а ўстанова «Цэнтр рэгіянальнага развіцця ГДФ» накіравала зварот аб тэхнічных пытаннях рэалізацыі ідэі. У выпадку ўхвалы Гомельскім гарвыканкамам усталявання мемарыяльнага знака, актывісты пачнуць збор сродкаў і абвесцяць конкурс на найлепшы эскіз з прыцягненнем мясцовых сродкаў масавай інфармацыі, грамадскіх арганізацый і іншых зацікаўленых асоб.