ЗША ўвялі новыя санкцыі супраць крамлёўскіх алігархаў і чыноўнікаў
39- 6.04.2018, 15:40
- 54,949
Іх актывы ў ЗША будуць замарожаныя.
Мінфінансаў ЗША ўвяло санкцыі супраць 38 расейскіх бізнэсоўцаў, афіцыйных асоб і кампаній. Пра гэта гаворыцца ў дакуменце, апублікаваным на сайце міністэрства, паведамляе bbc.com.
У спіс трапілі бізнэсоўцы з "крамлёўскага спісу" Алег Дзерыпаска, Кірыл Шамалаў, Віктар Вексельберг, а таксама сенатар Сулейман Керымаў, кіраўнік ЗГБ Андрэй Косцін, кіраўнік "Газпрома" Аляксей Мілер.
Пра тое, што ЗША рыхтуюцца пашырыць санкцыі ў дачыненні да расейскіх алігархаў, паведамілі ў сераду Reuters і Вашынгтон пост.
"Гэта, будзе, магчыма, самы агрэсіўны крок у дачыненні да расейскай эліты", - пісаў Reuters.
Прэс-сакратар расейскага прэзідэнта Дзмітрый Пяскоў тады заявіў, што Крэмль не атрымліваў "якіх-небудзь афіцыйных пацверджанняў ці афіцыйных заяў" з нагоды пашырэння санкцый і допыту расейскіх бізнэсоўцаў.
Акрамя таго, Пяскоў заявіў, што фразу "расейскія алігархі" ён уважае за недарэчную.
З'яўленню новых санкцыйных спісаў папярэднічала публікацыя "крамлёўскага дакладу" мінфіна ЗША, у які ўвайшлі 210 чалавек. Гэты дакумент у жніўні мінулага года даручыў падрыхтаваць Дональд Трамп.
Як паведамляе "Гордон", у спіс трапілі:
• Андрэй Акімаў, старшыня праўлення "Газпромбанка"
• Уладзімір Багданаў, бізнэсовец
• Цімур Валіулін, начальнік Галоўнай управы ў барацьбе з экстрэмізмам міністэрства ўнутраных спраў Расейскай Федэрацыі
• Віктар Вексельберг, бізнэсовец
• Алег Гаварун, кіраўнік прэзідэнцкай управы ў сацыяльным і эканамічным супрацоўніцтве з краінамі-ўдзельніцамі Садружнасці Незалежных Дзяржаў, Рэспублікі Абхазія і Рэспублікі Паўднёвая Асеція
• Алег Дзерыпаска, бізнэсовец
• Аляксей Дзюмін, губернатар Тульскай вобласці
• Аляксандр Жараў, кіраўнік Федэральнай службы нагляду ў сферы сувязі, інфармацыйных тэхналогій і сродкаў масавай інфармацыі
• Віктар Золатаў, дырэктар Федэральнай службы нацыянальных гвардзейскіх войскаў і камандуючы нацыянальнымі гвардзейскай войскамі Расейскай Федэрацыі.
• Сулейман Керымаў, бізнэсовец
• Уладзімір Калакольцаў, міністр унутраных спраў Расейскай Федэрацыі, генерал паліцыі Расейскай Федэрацыі
• Канстанцін Касачоў, старшыня Камітэта Савета Федэрацыі ў замежных справах
• Андрэй Косцін, кіраўнік ВТБ
• Аляксей Мілер, старшыня праўлення "Газпрома"
• Мікалай Патрушаў, сакратар Савета Бяспекі Расейскай Федэрацыі
• Уладзіслаў Рэзнік, дэпутат Дзярждумы
• Ігар Ротэнберг, бізнэсовец
• Андрэй Скоч, дэпутат Дзяржаўнай Думы
• Аляксандр Торшын, намеснік старшыні Цэнтральнага Банка РФ
• Уладзімір Усцінаў, паўнамоцны прадстаўнік прэзідэнта РФ у Паўднёвай федэральнай акрузе
• Міхаіл Фрадкоў, Дырэктар Расейскага інстытута стратэгічных даследаванняў
• Сяргей Фурсенка, член савета дырэктараў "Газпром нафты"
• Кірыл Шамалаў, бізнэсовец
• Яўген Школаў, памочнік прэзідэнта Расейскай Федэрацыі
У прэс-рэлізе Мінфіна ЗША ўказана, што пад санкцыі таксама падпадаюць 12 кампаній, якія належаць расейскім "алігархам".
У міністэрстве патлумачылі, што пастанова аб пашырэнні санкцыйнага спісу рушыла ўслед за публікацыяй дакладу ў мэтах выканання раздзелаў закона ЗША "Аб супрацьдзеянні апанентам Амерыкі праз санкцыі" (CAATSA) са спісамі расейскіх чыноўнікаў, кіраўнікоў дзяржкампаній і мільярдэраў, так званага "крамлёўскага спісу".
"Сённяшняя пастанова нацэленая на шэраг асоб, пералічаных у дакладзе, у тым ліку тых, хто атрымлівае выгады ад рэжыму Пуціна і адыгрывае ключавую ролю ў падтрымцы зламысных дзеянняў Расеі", - адзначаецца ў заяве.
Як удакладнілі ў Мінфіне, грамадзянам ЗША забаронена весці бізнэс з фізічнымі і юрыдычнымі асобамі з санкцыйнага спісу. Актывы фігурантаў спісу, якія падпадаюць пад юрысдыкцыю ЗША, будуць замарожаныя. У міністэрстве папярэдзілі, што пад санкцыі могуць патрапіць і неграмадзяне ЗША, якія будуць ажыццяўляць транзакцыі ў інтарэсах або ад імя названых асоб.
Згодна з законам CAASTSA, міністэрства фінансаў ЗША ў супрацоўніцтве з Дзяржаўным дэпартаментам 29 студзеня 2018 года падало Кангрэсу "крамлёўскі даклад" - спіс з 114 высокапастаўленых чыноўнікаў і 96 алігархаў, блізкіх да "расейскага рэжыму". У ім згаданыя памочнікі і дарадцы Пуціна, усе члены ўрада РФ, уключаючы прэм'ера Дзмітрыя Мядзведзева, мэры Масквы і Санкт-Пецярбурга.
У спіс таксама патрапілі бізнэсоўцы з багаццем, большым за $1 млрд. Яны займаюць першыя 96 месцаў у леташнім рэйтынгу 200 найбагацейшых бізнэсоўцаў Расеі, падрыхтаваным расейскай версіяй выдання Forbes.