Пуцін прапанаваў Рагозіну ўзначаліць «Раскосмас»

Былы віцэ-прэм'ер РФ ужо даў сваю згоду і абяцаў апраўдаць давер.

Прэзідэнт Расеі Уладзімір Пуцін прапанаваў былому віцэ-прэм'еру Дзмітрыю Рагозіну ўзначаліць дзяржкарпарацыю «Раскосмас». Пуцін зрабіў гэтую прапанову Рагозіну падчас сустрэчы на палях Пецярбургскага міжнароднага эканамічнага форуму ў чацвер, 24 траўня, паведамляе DW.

Рагозін прыняў прапанову і абяцаў апраўдаць давер. «Я зраблю ўсё магчымае і неабходнае, каб апраўдаць ваш давер», - адказаў былы віцэ-прэм'ер.

Дзяржаўная карпарацыя па касмічнай дзейнасці «Раскосмас» была створаная ў 2015 годзе на ініцыятыву Рагозіна шляхам пераўтварэння аднайменнага Федэральнага касмічнага агенцтва. Дагэтуль «Раскосмасам» кіраваў Ігар Камароў.

Дзмітрый Рагозін займаў пасаду намесніка кіраўніка ўрада Расеі на працягу сямі апошніх гадоў. Ён з'яўляецца старшынём калегіі Вайскова-прамысловай камісіі Расеі, назіральнай рады «Раскосмаса», назіральнай рады Фонду перспектыўных даследаванняў (ФПІ) і некаторых іншых калегій і камісій. Рагозін таксама курыраваў ВПК, абаронзамовы, нацыянальную абарону, мабілізацыйную падрыхтоўку, марскую палітыку, атамны, ракетна-касмічны і іншыя сектары прамысловасці, а таксама будаўніцтва касмадрома Усходні.