Дональд Трамп даў Паўночнай Карэі другі шанец

Перамовы з КНДР усё яшчэ могуць адбыцца.

Прэзідэнт ЗША Дональд Трамп абвясціў пра перазапуск дыялогу з Паўночнай Карэяй пасля скасавання сустрэчы з лідарам КНДР Кім Чэн Ынам. Са слоў кіраўніка Белага дома, перамовы з кіраўніком КНДР усё яшчэ могуць адбыцца, паведамляе «Радыё Свабода».

У чацвер Трамп абвясціў аб тым, што запланаваная на 12 чэрвеня ў Сінгапуры сустрэча з Кім Чэн Ынам не адбудзецца. Прычынай такой пастановы сталі нядаўнія непрыязныя заявы з боку Паўночнай Карэі. У Дзяржаўным дэпартаменце ЗША таксама адзначылі, што ў апошнія дні Вашынгтон не атрымліваў адказу Пхеньяна на свае неаднаразовыя запыты аб падрыхтоўцы сустрэчы.

Паўночная Карэя выказала заклапочанасць аднабаковым скасаваннем перамоў. У КНДР заявілі, што, нягледзячы на пастанову Дональда Трампа, гатовыя працягваць дыялог. Генеральны сакратар ААН Антонію Гутэрыш заклікаў абодва бакі не спыняць пошук шляхоў адмовы ад ядзернай зброі на Карэйскай паўвыспе.