Эканаміст: Рынкавыя інструменты дзейнічаюць толькі ў рынкавай эканоміцы

Новы ўказ пра рэструктурызацыю запазычанасці можа спрацаваць на шкоду.

Прадаваць крэдытныя дамовы з дысконтам і нават прабачаць завінавачанасці дазволіць банкам указ №200 «Аб рэструктурызацыі запазычанасці і спыненні абавязанняў», які прэзідэнт падпісаў 24 траўня, піша cайт «Беларусы і рынак».

Банкі ўсіх формаў уласнасці змогуць браць удзел у кіраванні дзейнасцю завінавачаных прадпрыемстваў, абмяняўшы праблемныя пазыкі за крэдыты на іх акцыі, гаворыцца ў паведамленні Лукашэнкі. Акрамя таго, банкі атрымаюць права прадаваць праблемныя пазыкі са зніжкай.

«Гэта дазволіць аднаму банку акумуляваць усе праблемныя крэдыты арганізацыі для ажыццяўлення іх рэструктурызацыі ў мэтах зніжэння крэдытнай нагрузкі пазычальніка», - адзначаецца ў паведамленні.

Згодна з інфармацыяй прэс-службы, нормы ўказа дазволяць банкам нават прабачаць пазыкі прадпрыемствам, якія знаходзяцца ў цяжкім эканамічным становішчы.

«Указ стварае ўмовы для зніжэння сумы праблемнай запазычанасці арганізацый рэальнага сектара эканомікі за выплаты ў бюджэт і крэдытныя дамовы, змяншэння дэфіцыту абаротных сродкаў, прыняцця банкамі найбольш эфектыўных пастаноў аб рэструктурызацыі завінавачанасці і фінансаванні інвестыцыйных праектаў гаспадарчых таварыстваў, удзельнікамі якіх яны становяцца», - гаворыцца ў каментары.

На момант здачы нумара ў друк тэкст дакумента не быў апублікаваны, таму даць яму поўную ацэнку было цяжка. Тым не менш асаблівага аптымізму ў экспэртаў указ не выклікаў.

«Захады, якія прадугледжвае ўказ, - гэта нармальныя рынкавыя захады, якія даўно і паспяхова выкарыстоўваюць ва ўсім свеце. Аднак калі іх прапануюць выкарыстоўваць у нас, часцяком забываюць, што такія інструменты працуюць толькі ў рынкавай эканоміцы», - заявіў старэйшы аналітык« Альпары» Вадзім Ёсуб.

У нашай сістэме кіравання такія механізмы альбо працаваць не будуць, альбо будуць працаваць дрэнна, альбо будуць прыносіць толькі шкоду, мяркуе экспэрт. Банкі будуць вымушаныя займацца неўласцівай ім дзейнасцю і кіраваць прамысловымі прадпрыемствамі.

Не выключана, што ім давядзецца прабачаць пазыкі, калі пра гэта іх настойліва папросяць. Магчымая і зваротная сітуацыя: праваахоўныя органы не пагодзяцца з матывамі, згодна з якімі банк надумаў прабачыць завінавачанасць. Тое ж самае можа адбыцца і з продажам пазык з дысконтам, калі зноў-такі паўстане пытанне з нагоды недаатрыманай прадаўцом прыбытку, у выніку чаго, з пункту гледжання праваахоўных органаў, была прычыненая шкода бюджэту.