Як Лукашэнка з году ў год віншуе Аліева
8- 28.05.2018, 21:15
- 14,402
Словы «паглыбленне» і «патэнцыял» паўтараюцца часцей за ўсё, але на справе атрымліваецца ўсё наадварот.
28 траўня Аляксандр Лукашэнка традыцыйна павіншаваў кіраўніка Азербайджана Ільхама Аліева з нацыянальным святам - Днём Рэспублікі.
«Шчыра рады таму, што беларуска-азербайджанскае супрацоўніцтва характарызуецца як гістарычна дружалюбнымі адносінамі паміж нашымі народамі, так і актыўным імкненнем дзвюх краін да паглыблення стратэгічнага партнёрства», - гаворыцца ў віншаванні.
«Салідарнасць» вывучыла архіў ранейшых віншаванняў і выявіла цікавую заканамернасць.
2017
Аляксандр Лукашэнка выказаў перакананасць, што ўзаемнае імкненне да развіцця актыўнага двухбаковага дыялогу будзе і ў далейшым садзейнічаць паглыбленню і пашырэнню ўзаемавыгаднага беларуска-азербайджанскага супрацоўніцтва.
2016
Аляксандр Лукашэнка выказаў перакананасць, што рэалізацыя патэнцыялу беларуска-азербайджанскіх стасункаў дасць магчымасць значна ўмацаваць палітычнае і эканамічнае ўзаемадзеянне.
2015
«Кіраўнік дзяржавы» выказаў перакананасць, што сумесныя дзеянні ў рэалізацыі значнага патэнцыялу беларуска-азербайджанскага ўзаемадзеяння - годны прыклад супрацоўніцтва ў духу традыцый дружбы і добрасуседства.
2014
Аляксандр Лукашэнка выказаў перакананне, што паспяховая рэалізацыя беларуска-азербайджанскіх сумесных праектаў будзе садзейнічаць нарошчванню двухбаковага ўзаемадзеяння ва ўсіх сферах і ўмацаванні традыцыйных повязяў дружбы паміж двума брацкімі народамі.
2013
«З задавальненнем адзначаю, што беларуска-азербайджанскае супрацоўніцтва мацнее з кожным годам. Нашы асабістыя сустрэчы пераканаўча прадэманстравалі значны патэнцыял для далейшага развіцця двухбаковага ўзаемадзеяння».
***
Словы пра імкненне нашых краін да паглыблення партнёрства, што паўтараюцца з году ў год, трохі здзіўляюць. Быццам бы і дыпламатычныя стасункі паміж дзяржавамі доўжацца не першы дзясятак гадоў. Ды і першыя асобы ва ўладзе і тут і там усё тыя ж. А вось на новы ўзровень пасля стадыі развіцця ўсё яшчэ выйсці не ўдалося.
Што, да прыкладу, пацвярджае статыстыка тавараабароту паміж нашымі краінамі:
2012 - $223,3 млн
2013 - $290,4 млн
2014 - $326,7 млн
2015 - $290,5 млн
2016 - $171,7 млн
2017 - $160,8 млн.