Праз інфляцыю ў Венесуэле з балівараў сталі рабіць жаночыя сумкі і партманэты
2- 24.06.2018, 10:22
- 13,867
«Мільянерам» у краіне стае грошай толькі на рыс.
Венесульскія рамеснікі знайшлі новы спосаб заробку - на цэнтральным рынку памежнага калумбійскага гарадка Кукута яны прадаюць сумкі і гаманцы, зробленыя з нацыянальнай валюты сваёй краіны. Сёння мінімальны месячны заробак у краіне складае 3 млн балівараў - крыху больш за $1, паведамляе ТАСС.
Балівар бы не ўхваліў
Валюта дзяржавы, роўна як і яе поўная назва - Баліварыянская Рэспубліка Венесуэла (БРВ), нясе ў сабе імя вялікага лацінаамерыканскага рэвалюцыянера і змагара за незалежнасць ад гішпанскага валадарства. Менавіта Сымону Балівару абавязаныя сваёй незалежнасцю такія краіны, як Венесуэла, Калумбія і Эквадор.
Эканоміка сучаснай Венесуэлы знаходзіцца ў вельмі глыбокім крызісе, выкліканым як падзеннем агульнасусветных коштаў энэргарэсурсаў, так і неэфектыўнай (ва ўяўленні заходніх эканамістаў) манетарнай палітыкай уладаў рэспублікі. І маштабы гэтага крызісу знайшлі сваё адлюстраванне ў тэмпах інфляцыі і курсе балівара ў дачыненні да сусветных валют.
За адзін толькі травень 2018 года, паводле звестак кантраляванай апазіцыяй Нацыянальнай асамблеі, інфляцыя ў краіне склала 24 500% у гадавым вылічэнні. На чорным рынку ў Венесуэле адзін даляр ЗША можна набыць за за 2,8 млн балівараў.
А з моманту абрання прэзідэнта Нікаласа Мадура ў 2013 годзе балівар страціў 99% сваёй кошту, стаўшы самай таннай сусветнай валютай у абарачэнні.
Пры гэтым Венесуэла - краіна з буйнымі нафтавымі, газавымі і залатаноснымі радовішчамі, з насельніцтвам больш за 30 млн чалавек.
Мяса - ужо раскоша
Згодна з ацэнкай венесуэльскага Цэнтра дакументавання і сацыяльнага аналізу, кошт набору прадуктаў для сям'і з пяці чалавек у траўні перавысіў 220 млн балівараў. Пры гэтым яшчэ ў красавіку 2017-га ён складаў 101 млн.
З улікам сродкаў, што выдзяляюцца Каракасам на куплю грамадзянамі харчовых тавараў, мінімальны гарантаваны даход венесуэльца, які мае працу, цяпер складае 5,2 млн балівараў (амаль 100 рублёў). На гэтую суму яшчэ ў студзені можна было набыць 50 яек. Або адзін кілаграм ялавічыны.
Як гаворыцца ў дакладзе ENCOVI 2017, апублікаваным у лютым 2018 го трыма вядучымі ўніверсітэтамі краіны, кожны жыхар баліварыянскай рэспублікі страціў за мінулы год у сярэднім 11 кг вагі праз недаяданне.
«Набыць няма чаго. На пошукі ежы могуць сысці гадзіны», - распавёў Miami Herald артапед з Каракаса Андэрсан Гутыерэс.
На фоне такога харчовага крызісу краіну штодня пакідае амаль 5 тысяч чалавек, гаворыцца ў дакладзе Управы Вярхоўнага камісара ААН у справах бежанцаў (УВКБ).
Дзеянні ўрада
Урад Мадура мяркуе, што асноўнай прычынай эканамічнага крызісу з'яўляецца «эканамічная вайна», якую вядуць супраць Венесуэлы «капіталісты і алігархі», а таксама Вашынгтон. І перыядычна з Каракаса зыходзяць ініцыятывы, накіраваныя на выпраўленне сітуацыі.
Так, напрыклад, у лютым урад запусціў новую крыптавалюту рetro, базавы кошт якой роўны аднаму барэлю венесуэльскай нафты. Прэзідэнт Мадура нават загадаў выдзеліць на забеспячэнне валюты больш чым 5 млрд барэляў нафты з радовішча Аякуча на поўначы краіны.
Заходнія СМІ выказаліся аб новай крыптавалюте як аб «бескарыснай», аднак ужо ў красавіку стала вядома пра намер Каракаса набываць аўтазапчасткі для аўтамабіляў «КамАЗ» за рetro.
А з 1 траўня кошты прадуктаў у краіне павінны былі паказвацца ў новай валюце пад назвай «суверэнны балівар», аб стварэнні якой было абвешчана ў сакавіку. Улады краіны хацелі цалкам выключыць старую валюту з абарачэння да 4 чэрвеня, але адклалі ўвядзенне новага балівара да 4 жніўня.
Нарэшце, 21 чэрвеня венесуэльскія вайскоўцы правялі рэйды па дзесятках харчовых рынкаў краіны. «Вялікая колькасць мафіёзі, аптавікоў, злодзеяў і капіталістаў была арыштаваная. Мы знайшлі там усё, нават прастытуцыю», - паведамляе BBC словы прэзідэнта Мадура.
У дачыненні да БРВ па гэты дзень дзейнічаюць жорсткія эканамічныя санкцыі ЗША. Нягледзячы на эканамічны крызіс і высокі ўзровень беднасці ў краіне (у 2017 годзе ён склаў 87%) Вашынгтон увёў дадатковыя санкцыі 20 траўня. І як распавёў тэлеканалу Globovision эканаміст Раміра Малін, новыя захады «нацэленыя на недапушчэнне існавання крыніц фінансавання» Каракаса.