Самыя бедныя і самыя «багатыя» рэгіёны Беларусі

У траўні адбылося новае даследаванне рабочай сілы Беларусі.

Сайт banki24.by прааналізаваў афіцыйныя звесткі і склаў рэйтынг рэгіёнаў, куды варта імкнуцца ці наадварот лепш не совацца. Падчас абследавання рабочай сілы ўлады атрымалі інфармацыю з 11,3 тысяч буйных і сярэдніх прадпрыемстваў, на якіх працавала больш за 2,6 млн чалавек.

Паводле звестак Белстата, у траўні 2018 гадоў у эканоміцы Беларусі было занята 4,3 мільёна чалавек. Таму выбарку можна назваць прадстаўнічай. Калі зыходзіць з выбаркі, то ў Беларусі ёсць нямала тэрыторый, дзе вялікай колькасці работнікаў налічваюць заробак, ніжэйшы за 300 BYN.

У траўні 2018 рэгіёнам з найбольшай доляй такіх людзей быў Шаркаўшчынскі раён Віцебскай вобласці. Тут заробак, ніжэйшы за 300 BYN, налічвалі 15% занятых. Кожны сёмы жыхар гэтага рэгіёна хоць і працаваў, але фактычна знаходзіўся на мяжы выжывання.

Крыху меншая доля работнiкаў з заробкам да 300 BYN была ў Браслаўскім раёне - 14,8%.

Наступным у сумным топ-3 бедных рэгіёнаў ідзе Хоцімскі раён Магілёўскай вобласці. У Хоцімскім раёне 9,4% работнікаў абследаваных арганізацый быў налічаны заробак, ніжэйшы за 300 BYN. Менавіта ў Хоцімскім раёне нарадзілася і пражыла першыя гады экс-кіраўніца Нацбанку Надзея Ермакова.

Можна адсартаваць рэгіёны і з іншага боку - напрыклад, па 500 BYN. Тады выявіцца, што больш чым у паловы работнікаў з 7 раёнаў Беларусі налічаныя заробкі не перавышалі гэтай сумы. У азначанай катэгорыі ў траўні 2018 увайшлі Шаркаўшчынскі (55,4%), Мсціслаўскі (54,7%), Бабруйскі (54,1%), Кармянскі (51,2%), Ушацкі (50,6%), Хоцімскі ( 50,5%) і Лоеўскі (50,1%) раёны. Яшчэ ў 51 раёне Беларусі налічаныя заробкі ад 40,3% да 49,3% занятых таксама не дасягалі 500 BYN.

Увогуле, жорсткая беднасць дагэтуль шырока распаўсюджана па беларускай правінцыі.

А што ж з абяцаным уладамі заробкам па 1 000 BYN?

Нідзе ў Беларусі такі заробак не быў налічаны абсалютнай большасці. Найлепшыя паказчыкі ў траўні 2018 меў Першамайскі раён Менска, дзе 47,7% занятых маглі пахваліцца налічаным заробкам 1 000 BYN і вышэй. Да Першамайскага раёна сталіцы Беларусі прыпісаны Парк высокіх тэхналогій. З гэтай прычыны першае месца раёна ў рэйтынгу выглядае цалкам лагічна.

Ледзь горшымі ў траўні 2018 былі вынікі Партызанскага раёна Менска (45,6%), Салігорскага раёна (45%), Жодзіна (43,8%), Цэнтральнага раёна Менска (43,2%), Наваполацка (43%).

У Салігорскім раёне высокія заробкі маюць работнікі Беларуськалію, у Жодзіне - БелАЗ, у Наваполацку - Нафтану. Калі ісці далей і глядзець заробкі ад за 2 000 BYN, то іх у ведамасці бачыла абсалютная меншасць ва ўсёй тэрыторыі краіны. Доля занятых з налічаным заробкам 2 000 BYN і больш у траўні 2018 перавышала 5% толькі на 15 тэрыторыях. У гэты спіс уваходзілі 9 раёнаў Менска, Салігорскі, Рэчыцкі, Менскі, Астравецкі раёны і Жодзіна з Наваполацкам.